Compectus – динамикли, ўралувчи Bluetooth-клавиатура

  •   DiMaX
  •  1324
  •  22.08.2017 18:19

Compectus – динамикли, ўралувчи Bluetooth-клавиатура

Ихчам клавиатуралар қулай бўла олмаслиги ҳақидаги фикрларни Compectus йўққа чиқармоқда. Оригинал тузилиши туфайли бу гаджетни том маънода трубка шаклида ўраб, ёнингизда олиб юришингиз мумкин. Керак бўлиб қолганида эса уни икки-уч сония ичидаёқ ёйиб, ишлата бошлайсиз.

Мазкур клавиатурадаги тугмачалар беш қаторга жойлашган бўлиб, уларни алюминийдан ясалган ўзагига ўраб қўйиш мумкин. Ўзакнинг ўзида эса смартфон ёки планшетни маҳкамлаб қўйиш учун йиғма кронштейн ҳам мавжуд.

Ёйилган ҳолида клавиатурани ўзакдан ажратиб олиб, фойдаланувчининг ўзига қулай ҳолда жойлаштириб ҳам ишлатса бўлади. Худди кўпчилик ноутбуклардаги каби, унинг ҳам функционал клавишлари қурилмани бошқаришга мўлжалланган қўшимча имкониятлар билан таъминланган. Уларни ишга тушириш учун эса Fn тугмачасини босиш керак бўлади.

Compectus’нинг яна бир ўзига хослиги эса унинг аудиотизими ҳисобланади. Мазкур тизим иккита олд ҳамда ўзакнинг икки ёнида жойлашган паст частотали динамиклардан иборатдир. Клавиатуранинг ўзига ўрнатилган микрофон эса онлайн-конференциялар ўтказишда жуда қўл келади.

Compectus клавиатураси iOS, Android, Windows ҳамда macOS операцион тизимли қурилмалар билан биргаликда ишлай олади. Клавиатуранинг батареялари уч кун ишлашга етарли қувват сақлайди. Динамикли ўзакка алоҳида ўрнатилган аккумулятор эса уни 7–8 соатлик иш мобайнида қувват билан таъминлай олади.

Мазкур қурилма тўрт хил – кумушранг, тилларанг, атиргулсимон тилларанг ҳамда қора тусларла ишлаб чиқарилади. Унинг жамланмасида клавиатурани солиб қўйишга мўлжалланган юмшоқ ғилоф ҳам мавжуд.

Compectus қурилмасига Indiegogo сайти орқали атиги 88 АҚШ доллари эвазига буюртма бериш мумкин. Агарда лойиҳа керакли миқдордаги маблағни тўплай олса, клавиатурани шу йилнинг сентябриданоқ олиш имкони бўлади.