Counter-Strike Mobile? Valve ўзининг таниқли шутерини мобил қурилмаларга чиқариши мумкин!

Counter-Strike Mobile? Valve ўзининг таниқли шутерини мобил қурилмаларга чиқариши мумкин!

Март ой бошида кенг тарқалган миш-мишлардан сўнг, Valve ўзининг Counter-Strike 2 ўйинини расман оммага тақдим қилди. Бу ҳозирги Counter-Strike: Global Offensive ўйинининг Source 2 платформасига ўтказилган версияга бўлиб, у ҳозирда синовдан ўтказилмоқда. Янги Counter-Strike барқарор версияда барча учун ёзда чиқарилиши кутилаётган бир вақтда, Counter-Strike ишқибозлари мобил қурилмалар учун тайёрланаётганини иддао қилишмоқда.

Aquarius исмли Twitter фойдаланувчиси Source 2 манбасидан iOS ва Android учун қўллаб-қувватлаш кодлари борлигини пайқаб қолди ва унинг скриншотларини ўз саҳифасига жойлади. Скриншотларнинг бири ўйиннинг бошқа платформалар учун, масалан, мобил қурилмалар учун қўллаб-қувватланишини ўз ичига олади. Иккинчисида эса ўша мобил қурилма қувватланаётган пайтда fps (кадр/секунд) оширилиши буйруғи борлигини кўришингиз мумкин.

Яна бир Counter-Strike ишқибози, Gabe Follower ҳам Aquarius хабарини тасдиқлаган ҳолда ўзининг скриншотларини улашди. У Counter-Strike дастурчилари бир йилларча аввал ўйинни бошқа платформалар учун чиқаришни режалаштираётганликлари ҳақида миш-мишлар тарқалганлигини эслатади.

Шунингдек, Gabe Follower скриншотлардаги сатрлар ва буйруқлари бошқа ўйинлардан қолган бўлиши мумкинлигини, лекин улар Dota 2 ёки Aperture Desk Job ўйинларида мавжуд эмаслиги, аммо Dota Underlords ва Artifact (Valve Source 2 да iOS ва Android учун ишлаб чиқилган ўйинлар) да мавжуд эканлигини таъкидлайди.

Дунёдаги энг машҳур шутер ўйинлардан бири бўлишига қарамай Counter-Strike шу кунга қадар ҳали расман мобил версиясида тақдим қилинмаган. Valorant, Call of Duty: Warzone каби CS рақобатчилари эса аллақачон ўзларининг мобил версияларини ишлаб чиқишмоқда. Миш-мишлар қанчалик тўғри бу ҳозирча номаълум, лекин биз Valve'дан Counter-Strike Mobile ўйинини кутиб қоламиз ва сизни янгиликлардан хабардор қилиб борамиз.

Сайт янгиликларидан доимий хабардор бўлиш учун Телеграм каналимизга қўшилинг!