Counterpoint: Икки давлат сабаб жаҳон смартфон бозорида ижобий ҳолат кузатилмоқда
Canalys ва Strategy Analytics компаниялари глобал смартфон бозори таҳлилини эълон қилганидан сўнг, Counterpoint Research ҳам ақлли мобил қурилмаларнинг бутун жаҳон бўйлаб савдоларига доир тўлиқ таҳлилини тақдим қилди.
Юқоридаги икки таҳлилчи жаҳон смартфон бозорида ўсиш бўлганлиги хабарини берган. Лекин Counterpoint савдоларда деярли ўзгариш бўлмаганини айтмоқда. Компаниянинг маълум қилишича, жорий молия йилнинг учинчи чорагида дунё бўйлаб 379.8 миллион дона смартфон сотилган, ўтган йилнинг мос даврида эса бу кўрсаткич 380 миллионни ташкил этган. Таҳлил натижаларидаги бундай қарама-қаршиликка қарамай, ҳар учала компания ҳам савдоларнинг кетма-кет етти квартал давом этган кескин пасайиши ва ниҳоят якунлангани борасида бир хил фикрда.
Counterpoint таҳлилчиси Шобҳит Сриваставанинг айтишича, Ҳиндистон ва Хитойда, айниқса, ўсиш кузатилган.
Бироқ бошқа бозорларда вазият унчалик ҳам яхши эмас. Учинчи чоракда Huawei Хитойда катта муваффақият қозонган бўлса-да, Google иловаларининг мавжуд эмаслиги сабаб Европа, Лотин Америкаси ва Ўрта Шарқдаги савдоларда пасайиш кузатилди. Компаниянинг АҚШ ва Хитой ўртасидаги савдо уруши қурбонига айлангани рақиб Samsung ва Xiaomi'лар фойдасига ишлади.
Counterpoint ўз таҳлилига бошқа кўплаб брендларни ҳам қўшган. Realme'нинг кўрсаткичлари аъло даражада бўлган, Tecno'нинг смартфонлари савдоси ҳам кўтарилиб, компания кучли ўнталикка кира олган. LG ва Motorola'да эса пасайиш кузатилди, Nokia эса ўнталикка кирмади.
ЎҚИНГ: Учинчи чоракда Samsung'нинг даромадлари ҳам камайди, ҳам кўпайди
