COVID-19 глобал смартфон савдосига қанчалик таъсир қилгани аниқланди

Global Gartner томонидан ўтказилган энг сўнгги саноат тадқиқоти жорий йилнинг биринчи чорагидаги смартфон савдоларига эътибор қаратди.

Хабарингиз бор, COVID-19 йил бошидан буён бутун дунё миқёсида катта талафотларга сабаб бўлиб келмоқда, глобал миқёсда ишлаб чиқариш ва савдолар кескин камайган.

Истеъмолчилар ҳаёт учун биринчи даражали муҳим бўлмаган маҳсулотларга бўлган харажатини камайтиргани боис смартфонларга бўлган талаб ҳам кескин тушиб кетган.

Шунга мувофиқ, ўтказилган тадқиқот натижаларидан маълум бўлишича, 2020 йилнинг биринчи чорагида смартфон савдолари йиллик 20.2% пасайишга учраган. Энг кўп смартфон сотган 5 компания Samsung, Huawei, Apple, Xiaomi ва Oppo бўлган. Шулар орасида фақатгина Xiaomi йиллик ўсишга эришган, аммо унинг кўрсаткичлари ҳам атиги 1.4% ни ташкил қилади, холос.

Samsung эса биринчи чоракда 55 миллион дона смартфон сотган. Ваҳоланки, ўтган йилнинг мос давридаги сотувлар 71 миллион дона эди. Huawei эса 42 миллион (ўтган йили 58 миллион эди) дона, Apple 40 миллион (ўтган йили 44 миллион эди) смартфон сотишга эришган. Huawei'нинг йиллик кўрсаткичи энг паст бўлса ҳам, компания сотувлар миқдори бўйича иккинчи ўринни эгаллаб турибди.

«Ўз мижозларига онлайн дўконлари орқали хизмат кўрсата олиш имкониятига эга бўлгани ва ишлаб чиқариш март ойи охирига бориб аввалги ҳолатга кела бошлагани сабабли Apple йил бошидаги ижобий кўрсаткичларни қайта тиклай олди. Компания йилни жуда ижобий бошлаган эди. Агар COVID-19 пандемияси содир бўлмаганда, Apple савдолари рекорд даражага етган бўларди. Таъминот занжиридаги узилишлар ва истеъмолчилар талабининг тушиб кетгани компаниянинг февраль ойидаги ижобий ҳолатини барбод қилди», дея тушунтиради Gartner'нинг тадқиқотлар бўйича вице-президенти Аннетт Зиммерманн.

Huawei'нинг эса пандемиядан кейин ҳам тикланиши қийин кечади. Ишлаб чиқариш ва савдоларнинг камайиши етмагандай, АҚШнинг тақиқи ҳам компанияга катта зарба бўлишда давом этади. Хабарингиз бор, Қўшма Штатлар ҳукумати хитойлик компаниянинг Америка бизнес ташкилотлари билан ҳамкорлик қилишини тақиқлаб қўйган. Шунинг учун, компания Google Play лицензиясидан маҳрум бўлган ва ўз қурилмаларини, Google хизматлари ўрнига, HMS (Huawei Mobile Services) билан жиҳозламоқда.

Gartner'нинг тўлиқ ҳисоботи билан танишиб чиқиш учун, мана бу ерга босинг.

ЎҚИНГ: 7 июнгача Xiaomi ва Redmi смартфонларини янада арзон олиш имкони бор!