Дастурлаш бўйича 150 жамоа иштирокида олимпиада ўтказилди
25-26 феврал кунлари Тошкент ахборот технологиялари университетида дастурлаш бўйича ТАТУ университети ва унинг ҳудудий бўлинмалари, Тошкент шаҳридаги Инҳа университети талабалари ўртасидаги олимпиаданинг финал босқичи ўтказилди. Бу тўғрида Ахборот технологиялари ва коммуникацияларини ривожлантириш вазирлиги Ахборот хизмати хабар тарқатмоқда.
2 босқичда ўтказилган турнирнинг илк босқичи 2017 йилнинг 11 февралида онлайн шаклда ташкил қилинган. Унда ТАТУ, унинг ҳудудий бўлинмалари, Тошкент шаҳридаги Инҳа университетининг талабаларидан иборат 150 жамоа иштирок этган.
26 февралда мусобақа ғолибларини тақдирлаш маросими бўлиб ўтди. Натижаларга кўра, турнирнинг мутлоқ ғолиблиги ТАТУнинг Урганч филиали номидан қатнашган «TUIT Urgench Branch #1» жамоасига, иккинчи ўрин ТАТУнинг «Tashkent U of IT 1» ҳамда 3-ўрин ТАТУнинг Урганч филиалининг «TUIT Urgench Branch #2» жамоаларига насиб этди.
Дастурлаш бўйича олимпиада ғолибларига пул мукофотлари топширилди. Тақдирлашда қайд этилганидек, бу турдаги танловларни мамлакатимизнинг барча олий ўқув юртларида ўтказиш режалаштирилмоқда.
