Dimensity 8100 Max чипи ҳамда 150 ватт қувватлаш технологиясига эга бўлган смартфон тақдим этилди
OnePlus компанияси OnePlus Ace янги брендини тақдим этиб, ўз тарихига янги саҳифани яратди. OnePlus Ace Хитой бозори учун тақдим этилган бўлиб, у 150 ватт қувватлаш технологияси, 120 гертсли AMOLED дисплей ва Dimensity 8100 Max чипи билан жиҳозланган.
Тезкор қувватлаш технологияси орқали смартфон 50% қувватланиш учун беш дақиқа вақт сарфлайди.
Ушбу техник кўрсаткичлардан келиб чиқиб OnePlus Ace модели бошқа бир BBK корпорациясига қарашли realme компаниясининг GT Neo3 смартфонига ўхшаш эканлигини сезиш мумкин..
Янги смартфонда OnePlus қурилмаларига хос бўлмаган бир қанча ўзгаришлар кузатилган. 16 мегапикселли юмалоқ тирқишли селфи камера дисплей юқорисининг марказида жойлашган. Одатда OnePlus смартфонларида селфи камера дисплей юқорисининг бурчагида бўлар эди.
Смартфонга ўрнатилган FHD+ AMOLED дисплейи 6.7 дюйм бўлиб, у 120 гертс частотани қўллаб-қувватлайди. Шунингдек, қурилма оптик тасвир барқарорлаштиргичга эга бўлган 50МП асосий камера, 8МП ультракенг камера ва 2МП макро камера билан жиҳозланган.
Смартфон ичидаги MediaTek Dimensity 8100 Max чипи 8/12ГБ тезкор ва 512ГБ гача бўлган доимий хотира билан интеграллашган. Компания Dimensity 8100 Max чипи одатий Dimensity 8100 қайси жиҳатлардан фарқ қилиши ҳақида ҳеч қандай баёнот бермаган.
Смартфондаги 4,500 мАс сиғимли аккумулятор 150 ватт SuperVOOC тезкор қувватлаш технологиясини қўллаб-қувватлайди. OnePlus иссиқликни назорат қилиш бўйича бир нечта чора-тадбирларни амалга оширди ва аккумулятор 1600 тўлиқ зарядлаш тциклидан кейин ўз қувватининг 80% дан ортиғини сақлаб тура олиши мумкин.
Янги қурилма Android 12 операцион тизимига асосланган ColorOS 12.1 график қобиғида ишлайди. Самртфон қора ва кўк рангларда сотувга чиқади. Унинг нархи қуйидагича:
8/128ГБ - 388 доллар
8/256ГБ - 420 доллар
12/256ГБ - 456 доллар
12/512ГБ - 456 доллар
Хитойда смартфон 26 апрель санасидан сотувга чиқади. Халқаро бозор учун эса у OnePlus 10R номи остида тақдим этилади.
