DNS созламалари орқали интернетни тезлаштирамиз

  •   DiMaX
  •  6233
  •  29.08.2018 17:23

DNS созламалари орқали интернетни тезлаштирамиз

Интернетда бирор сайтга кириш учун браузернинг манзил қаторига унинг манзилини терамиз, Enter тугмачасини босамиз – бўлди. Ёки тайёр хатчўп (закладка)лардан фойдаланамиз – буниси янада оддий.

ЎҚИНГ: Қандай қилиб Windows операцион тизими ишлашини тезлаштириш мумкин

Аммо шу оддийлик ортида дастурчиларнинг меҳнати ва интернет жиҳозларининг иши ётганини кўпинча хаёлимизга ҳам келтирмаймиз. Дейлик, бизга ўша сайтни очиб бериш учун компьютер «манзиллар китобчасига кўз ташлайди», домен номлари сервери – DNS’га сўров юборади ва жавобни кутади. Керакли саҳифанинг қанчалик тез очилиши фақатгина уланиш тезлигига эмас, балки DNS’нинг тезкорлигига ҳам боғлиқ. Хўш, унинг ишлашига биз таъсир кўрсатиб, интернетни тезлаштира оламизми?

Ҳа, бунда бизга бепул DNSBench дастури ёрдамга келади. Бунинг қандай амалга оширилишини қуйида кўриб чиқамиз.

1-ҚАДАМ: DNSBench утилитасини мана бу ҳавола орқали расмий сайтидан кўчириб оласиз. (Ушбу дастур Windows тизимига мўлжалланган; Linux тизимли компьютерлар учун эса Wine утилитаси мавжуд). DNSBench утилитаси ўрнатишни талаб этмайди, уни шунчаки «кўзга кўринарли» жойда сақласангиз етарли.

2-ҚАДАМ: DNSBench дастури устига сичқонча билан икки марта чертганча уни ишга туширасиз. DNS-серверлар рўйхати янгиланиб, ойнанинг юқори ўнг бурчагидаги қизил белгича айланишдан тўхтагунича кутасиз. Мазкур жараён бир неча дақиқа давом этади; шу муддат мобайнида интернетингиздан фойдаланаётган бошқа компьютерларни ҳамда ушбу компьютердаги интернетга уланган дастурларни (браузерларни ҳам) ўчиришингиз керак.

ЎҚИНГ: Google Chrome’ни 10 карра тезроқ ишлашга мажбур қиламиз

3-ҚАДАМ: Ўз DNS-серверлар рўйхатингизни яратасиз. Бунинг учун «Nameservers» варақасига ўтиб, «Add/Remove» тугмачасини босасиз. Очилган ойнанинг пастки қисмидаги «Build Custom Nameserver List» устига босасиз.

Энди бемалол бошқа ишларингизни қилиб олишингиз мумкин, чунки бу жараён тахминан 37 дақиқа давом этади. У якунига етгач, «Response Time» варақасига ўтасиз ва «Run Benchmark» тугмачасига босасиз.

Икки дақиқалардан сўнг кўз олдингизда нисбатан мақбул DNS-серверлар рўйхати намоён бўлади – улар сўровга жавоб бериш тезлигига кўра сараланган. Гарчи дастур интерфейси инглизча бўлса-да, параметрлар жадвалини тушуниш қийин эмас. Интернетингизнинг тезлиги учун қизил чизиқлар муҳимроқ; аммо барча рангдаги чизиқлар учун керакли хусусият – қанча қисқа бўлса шунча яхши. Сизнинг жойлашув ўрнингиз учун қайси сервер энг тезкор бўлса, ўшаниси рўйхатнинг бошида туради. Сизнинг компьютерингиз айни дамда созланган сервер эса тўқранг ёзувда ажратиб кўрсатилган. Агар унинг ўзи энг тезкори сифатида жадвал бошида турган бўлса, у ҳолда DNSBench дастурини ёпаверасиз – ҳеч нимани ўзгартиришга ҳожат йўқ. Агар у биринчи қаторда турмаган бўлса, унда кейинги қадамга ўтасиз.

4-ҚАДАМ: DNS созламаларини ўзгартирасиз. Ҳар эҳтимолга қарши, бирор нимани ўзгартиришдан аввал аввалги манзилларни ёзиб оласиз; шунда кейинчалик янги созламалар фойда бермаса, ўша эски ҳолатга қайтаришингиз мумкин бўлади. Лекин одатда юқоридаги ўзгаришлардан сўнг муаммо чиқмайди, балки аксинча – сайтларнинг очилиши тезлашади.

Янги серверга ўтиш учун қурилманинг, роутернинг созламаларида, ёки бевосита компьютердаги уланишнинг TCP/IP протоколи хусусиятларида энг тезкор DNS-манзилни кўрсатасиз.

Энди компьютерингизни бир ўчириб-ёқасиз ва интернетнинг ишлаш тезлигини текшириб кўрасиз.

Лекин бир нарсани ёдда тутинг: интернет ҳам жонли организмдек гап, у мунтазам ўзгаришда бўлади. Шу боис ҳам вақти-вақти билан юқоридаги усулда созламаларни янгилаб туриш зарар қилмайди.

ЎҚИНГ: Windows’ни тезлаштирувчи ва функцияларини яхшиловчи бепул дастурлар

Сайтимизнинг энг чиройли расмларини Инстаграмдаги саҳифамизда томоша қилинг!