Доналд Трамп аккаунти Instagram ва Facebook'да блокировкадан чиқарилди
Кеча Meta компанияси Доналд Трампни Facebook ва Instagram'да блокировкадан чиқараётганлигини эълон қилди. Чоршанба куни эълон қилган блог постида компания АҚШ собиқ президентининг аккаунтини кейинги бир неча ҳафта ичида қайта тиклашини айтди.
"Трамп аккаунтини чеклаш фавқулодда вазиятларда қабул қилинган фавқулодда қарор эди", дея тушунтирилади Meta баёнотида.
Маълум бўлишича, агар Трамп яна Meta'нинг контент сиёсатини бузадиган бўлса, компания унинг аккаунтини "бузилишнинг жиддийлигига қараб" бир ойдан икки йилгача блоклайди.
Эслатиб ўтиш жоизки, икки йил аввал, 2021 йилнинг 6 январ куни Капитолийга қилинган қонли ҳужумдан сўнг Доналд Трамп учун Facebook ва Instagram'дан фойдаланиш тақиқланган эди. Ўшанда Meta бош директори Марк Цукерберг Трамп зўравонликни қўзғатгани ва тартибсизликлар ҳаракатини мақтагани учун платформаларда "қора рўйхат"га тушганини айтган. Ўша вақтда Meta собиқ президентни блоклаган биринчи ижтимоий тармоқлардан бири эди.
Ўтган йилнинг ноябр ойида, Илон Маск Twitter'ни сотиб олгач, унда Доналд Трампни Twitter'га қайтариш ҳақида сўровнома ўтказди ва шундан сўнг собиқ президент Twitter'да блокировкадан чиқарилди. Бироқ, Трамп ҳали Twitter'га қайтганича йўқ.
Ҳозирда Доналд Трамп ўзининг Truth Social номли ижтимоий тармоғидан фойдаланади. Meta'нинг чоршанба кунги баёнотига жавоб тарзда эса Трамп бундай дейди:
"Севимли президентингиз, мени, "деплатформация" қилганидан бери миллиардлаб долларларни йўқотган Facebook, ҳозиргина менинг аккаунтимни тиклаётганини эълон қилди."
ЎҚИНГ: Twitter'да рекламаларни тўлиқ ўчириш имконияти пайдо бўлади
