Дорилар ва нархлари ҳақида мобиль илова орқали маълумот оласиз
2019 йил 12 июль куни Ўзбекистон Республикаси Президенти Администрацияси ҳузуридаги Ахборот ва оммавий коммуникациялар агентлигида Соғлиқни сақлаш вазирлиги ва Фармацевтика тармоғини ривожлантириш агентлиги томонидан матбуот анжуманида ташкил этилди. Ушбу тадбирда фармацевтика саноатидаги ислоҳотларга бағишланган дори-дармон сифатини назорат қилиш борасидаги ишлар хусусида ҳам тўхталиб ўтилди, деб ёзади ЎзА.
ЎҚИНГ: Илмда инқилоб: Исроилликлар 3D-принтерда одам тўқимасидан жонли юрак чоп этишди! (+видео)
– Хавотирга ўрин йўқ. Дори воситаларининг сифати қатъий назоратда бўлиб, сифатсиз дори воситаларининг ишлаб чиқарилишига ва четдан юртимизга кириб келишига асло йўл қўйилмайди, – деди тадбирда Соғлиқни сақлаш вазирлиги ҳузуридаги Фармацевтика тармоғини ривожлантириш агентлиги «Дори воситалари, тиббий буюмлар ва тиббий техника экспертизаси ва стандартлаштириш давлат маркази» ДУК ахборот-таҳлил бўлими бошлиғи Муҳаббат Иброҳимова. – Шу мақсадда фармацевтика тармоғини ривожлантириш Агентлиги қошида Дори воситалари, тиббий буюмлар ва тиббий техника экспертизаси ва стандартлаштириш давлат маркази фаолият юритаяпти.
Вазирликнинг Жамоатчилик билан алоқалар бўлими бошлиғи Фурқат Санаевнинг таъкидлашича, ушбу марказ Ўзбекистонга кириб келаётган ва ишлаб чиқарилаётган дори воситаларининг сифатини назорат қилади, уларни давлат рўйхатидан ўтказади. Мазкур муассаса томонидан 2018 йил ва 2019 йилнинг 1 майига қадар сифати талабга жавоб бермагани учун 258 номдаги дори воситалари ва тиббий буюмлар, 43 номдаги субстанцияларга мувофиқлик сертификати бериш рад этилган.
Қайд этилишича, бу борадаги ишлар янада такомиллиштирилиб, дори воситаларини электрон тарзда назорат қилиш тартиби белгиланади. Бунда халқаро тажрибаларни ўрганган ҳолда янги тизим жорий этиляпти. Унга кўра, ҳар бир импорт қилинаётган ва ишлаб чиқарилаётган дори воситасига махсус стикерлар ёки ёрлиқлар жойланиб, дори расталарига етказилади. Келгусида шу стикер ёки ёрлиқлар асосида аҳоли ҳар бир дори ва унинг нарх-навоси ҳақида мобиль илова орқали батафсил маълумот олиши мумкин бўлади.
ЎҚИНГ: Наманганда телетиббиёт тизими жорий этилади – у нима ўзи?
