Дроп-тест: Экспертлар оммабоп 12 смартфон орасидан энг «ўлмас»ини аниқлашди (+видео)

Мустаҳкам ҳимояга эга бўлган – зарбаларга чидамли, сув тубида ҳам ишлайверадиган махсус телефонлар кўп. Аммо, гарчи турли стандартларга кўра ҳимоя сертификатига эга бўлса-да, халқ орасида оммалашган моделларнинг ҳаммаси ҳам амалда уларчалик муҳофазали эмас.

ЎҚИНГ: Ulefone Armor Mini – қуввати 21 кунга етувчи, «ўлдириб бўлмас» арзон телефон

Tom’s Guide нашри мутахассислари АҚШда энг оммалашган 12 та моделдаги смартфоннинг мустаҳкамлигини амалда – махсус синовлар орқали синаб кўришди. Яъни, улар бу қурилмаларни аввал турли баландликдан ташлаб, сўнг эса сувга бўктириб текширишди.

Буни қарангки, бошқаларига нисбатан камроқ машҳур бўлган Motorola Moto Z2 Force моделининг корпуси энг яхши ҳимояланган бўлиб чиқди! Мутахассисларнинг таъкидлашларича, у синовда бир ярим метр баландликдан ташланганида шикастланмаган ягона смартфон бўлган. Икки марта – ёғочга ва бетонга ташлаб кўрилганида ҳам унинг шиша корпусида бирорта ҳам чатнаш ёки дарз кетиш кузатилмаган. Фақат корпуснинг ён қирраларида сал шикастлар сезилган.

Кейин Motorola Moto Z2 Force’ни сув тўлдирилган унитазга ташлаб, 5 дақиқа бўктириб қўйишган, шунда ҳам бу қурилма иш қобилиятини йўқотмаган, яъни корпус ичига сув кирмаган.

Мана, бу жараёнларни «жонли» видеода кўринг:

Экспертларга кўра, бошқа бирорта ҳам оммабоп смартфон бу синовнинг сўнгигача етиб бормаган – уларнинг корпуси дарз кетгани боис ичига сув кирган. Натижада бу гаджетларнинг электроника қисмида қисқа туташув юзага келган ва жиддий шикастланган, айримлари умуман ишдан чиққан.

Дарвоқе, Motorola Moto Z2 Force шундай «ўлмас» смартфон бўлмаса ҳам инсофдан бўлмасди, ахир...

ЎҚИНГ: Moto Z2 Force флагмани iPhone 8’дан ҳам қимматга тушяпти

Мазкур дроп-тестда иштирок этган барча моделлар рўйхати эса қуйида келтирилган. Бу рўйхат мустаҳкамлик рейтингига кўра тузилган, яъни унинг пастроғидагиларнинг корпуси мўртроқ.

1. Motorola Moto Z2 Force
2. LG X Venture
3. Apple iPhone X
4. LG V30
5. Samsung Galaxy S9
6. Motorola Moto G5 Plus
7. Apple iPhone 8
8. Google Pixel 2 XL
9. Huawei Mate 10 Pro
10. OnePlus 5T
11. Samsung Galaxy Note 8
12. Apple iPhone SE

«Terabayt.uz» таҳририяти сизларга ўз смартфонларингиз устида бунақа синовлар ўтказмасликни тавсия этади.

ЎҚИНГ: Топ-10: Энг қудратли Android-смартфонлар (AuTuTu талқини)