Дроп-тест: Galaxy S9 ва S9+ мустаҳкамлигини синаб, iPhone X билан таққослашди (+видео)
Samsung компаниясининг бу йил тақдим этилган Galaxy S9 ҳамда S9+ флагманлари ташқи кўриниши жиҳатидан аввалги «авлод»ларига жуда ўхшаш бўлиб қолганидан хабарингиз бор. Уларнинг фарқли жиҳатларини кўрсатиш учун жанубий кореялик техногигант ишлаб чиққан тўққизта видеороликни ҳам эълон қилганмиз.
ЎҚИНГ: Galaxy S9’нинг тўққизта устунлиги: 9. AR Emoji функцияси (+видео)
Гарчи Galaxy S9’ларнинг корпус дизайни ва материаллари олдинги авлод смартфонларига ўхшаса-да, деталларга назар солинса, фарқлар сезилади. Samsung янги флагманларини олд ва орқа томонидан янада қалинроқ шиша билан ҳимоялаган. Аниқроқ қилиб айтганда, унда қўлланган Gorilla Glass 5 шишаси бошқа қурилмалардагига нисбатан 20 фоизга қалинроқ ва мустаҳкамроқ.
Хўш, буларнинг барчаси охир-оқибатда Galaxy S9’ларнинг мустаҳкамлигини чиндан ҳам оширганми? Шуни амалда синаб кўриш учун SquareTrade суғурта компанияси махсус тестлар ўтказиб кўрди.
Мана, ўзингиз видеода томоша қилинг:
Гувоҳи бўлганингиздек, компания мутахассислари Galaxy S9 ҳамда S9+ флагманлари устида турли синовларни амалга ошириб кўришган ва унинг таъмирга яроқлилигини баҳолашган. SquareTrade компанияси ушбу тестлар натижасида телефонлар намоён этган балларни эълон қилган.
ЎҚИНГ: ЭКСКЛЮЗИВ ВИДЕО: Galaxy S9 мустаҳкамлигини тирнаб ва ёндириб синаб кўришди!
Айтиб ўтиш керакки, бу баллар шикастланиш эҳтимолини англатади – балл қанчалик баланд бўлса, қурилманинг бузилиш эҳтимоли шунчалик юқори ва унинг мустаҳкамлиги шунчалик паст.
Жадвалда кўриб турганингиздек, Samsung Galaxy S9 ҳамда S9+ моделлари бу тестлар натижасида умумий ҳисобда тегишлича 71 ва 76 балл олган. Таққослаш учун айтиш керакки, ўтган йилги Galaxy S8 ва S8+ моделлари бу тестда олган баллар тегишлича 76 ва 77 ни ташкил этади.
Шунингдек, «ашаддий рақиб» бўлмиш купертинолик гигантнинг iPhone X суперфлагмани ҳатто улардан ҳам мўрт бўлиб чиққанини – SquareTrade дроп-тестида 90 балл олганини эслаб ўтиш ўринли.
ЎҚИНГ: Эксклюзив видео: iPhone X’ни 300 метрлик баландликдан ташласа нима бўлади?
