Дроп-тест «жонли» видеоси: Galaxy S20 Ultra’ни аёвсиз синаб кўришди!

  •   DiMaX
  •  1814
  •  04.03.2020 14:03

Дроп-тест «жонли» видеоси: Galaxy S20 Ultra’ни аёвсиз синаб кўришди!

Samsung яқинда намойиш қилган Galaxy S20 Ultra, Galaxy S20 Plus ҳамда Galaxy S20 флагманлари Master Lu бенчмарки рейтингида барча рақибларини тор-мор этишган. Лекин самарадорлик бўйича AnTuTu натижалари бошқачароқ...

ЎҚИНГ: ТОП-10: Бу гал энди энг кучли смартфонлар бошқа! (AnTuTu рейтинги, 2020 йил февраль)

Samsung янги флагманларининг нархлари ҳам уларнинг тезкорлиги ва бошқа инновацион жиҳатларига яраша анча юқори. Масалан, уларнинг энг энг қиммат – Galaxy S20 Ultra моделини қўлингиздан тушириб юборсангиз, ўзингизни кечира олмайсиз...

CNET нашри эса жанубий кореяликларнинг айни шу энг кучли флагманининг мустаҳкамлигини аниқлаш учун аёвсиз дроп-тест ўтказиб кўришди. Мана, уни бирга томоша қиламиз:

Кўрганингиздек, Galaxy S20 Ultra’ни дастлаб бир метрлик баландликдан, экранини юқорига қаратиб ташлаб кўришган. Бунда дисплейнинг ўзига шикаст етмаган эса-да, корпуснинг орқасига ётқизилган Gorilla Glass 6 ҳимоя шишаси кўп жойларидан, айниқса бурчакларидан дарз кетган. Иккинчи мартасида ҳам худди шундай юксакликдан, фақат экранини пастга қаратиб ташлашган. Бу гал дисплей бурчакларида озроқ чатнаш кузатилган, уни ҳатто ҳимоя плёнкаси ҳам қутқариб қола олмаган.

Шундан сўнг Galaxy S20 Ultra тахминан 1,5 метр юқоридан ташлаб кўрилган, айтарли шикаст сезилмаган; кейин шу ишни яна икки марта такрорлашган. Беш марта ташланганидан сўнг флагманнинг орқа қопқоғи буткул синиб кетган, аммо экрани, бурчакларидаги дарзларни айтмаса, бутун қолган. Шунингдек, камера блогига ҳам бирор зиён етмаган. Энг қизиғи – шу ҳолида ҳам бу смартфон тўлақонли иш фаолиятини давом эттираверган!

Нима деб ўйлайсиз, Galaxy S20 Ultra ўз пулига арзирмикан?

ЎҚИНГ: Galaxy S20 Ultra автономлик тестида iPhone 11 Pro Max’ни зўрға енгди, лекин ғолиб – бултурги флагман!