Дунё смартфон бозорида рақобатчилар сони ортмоқда

Дунё смартфон бозорида рақобатчилар сони ортмоқда

Android платформасига мўлжалланган қурилмалар ишлаб чиқарувчи компаниялар ўртасидаги қизғин “жанг”да хитойлик янги рақиб – Oppo’нинг имкониятлари тобора ошиб бормоқда. 26 январь куни эълон қилинган компания релизида маълум қилинишича, йил давомида ушбу бренднинг 50 миллион дона смартфони сотилган ва ўсиш олдинги молиявий йилга нисбатан 67 %ни ташкил қилади.

Oppo смартфонлари Android Lollipop’нинг компания томонидан мослаштирилган ColorOS тизимида ишлайди. Улар бозорда жуда тез оммалашмоқда. Мисол учун, 2015 йилнинг май ойида эълон қилинган Oppo R7 Android аппарати шу йилнинг ўзида 15 миллион дона сотилган. 2015 йилда тақдим қилинган бошқа Oppo Mirror 5 ҳамда Neo 7 қурилмалари ҳам бозорни жадал забт этмоқда. Айниқса, Ҳиндистон компания учун йирик савдо нуқтаси. 2016 йилда Oppo’нинг бу ердаги савдо ҳажми 300 фоизга ўсиши кутилмоқда.

TrendForce тадқиқот фирмаси Oppo’ни дунёнинг энг муваффақиятли смартфон брендлари ўнталигида 8 ўринга муносиб кўрган. Фирма томонидан ўтказилган статистик изланишларга кўра, компаниянинг халқаро миқёсида сотилган смартфонлардаги ҳиссаси 3.8 %. Шунингдек, TrendForce жаҳон смартфон бозорида LG 5.3, Lenovo 5.4,  Xiaomi 5.6 ва Huawei 8.4 фоиз ҳиссага эгалигини айтган.

Oppo бунгача ҳам АҚШнинг Gartner тадқиқот ва консалтинг компанияси томонидан жаҳондаги мобиль воситалар ишлаб чиқарувчи оммабоп брендлар ўнталигига киритилган эди.

Ушбу рейтингда Samsung ва Apple етакчилик қилмоқда. Гарчи, аста-секин бўлса ҳам, бозорга кириб келаётган хитойлик “Android”чи компаниялар етакчи брендларнинг савдосига таъсир ўтказмоқда ва тез орада кучли рақибларга айланишлари мумкинлигини билдиришмоқда.

Январь бошида эса бошқа бир хитойлик смартфон ишлаб чиқарувчиси – Xiaomi 2015 йилда 70 миллиондан зиёд мобиль алоқа қурилмаларини сотганини эълон қилган эди.

Бошқа бир маркетинг тадқиқотларида қайд этилишича, Хитойнинг Huawei компанияси томонидан сотилган смартфонлар ҳажми 2015 йилнинг III чорагида 81 фоизга ошган ва компания йил якунига қадар 100 миллион дона смартфон сотишга муваффақ бўлган. Натижада Huawei дунёнинг смартфон ишлаб чиқарадиган энг йирик учинчи брендига айланди.

26 январь куни жаҳоннинг яна бир етакчи смартфон ишлаб чиқарувчиси – Жанубий Кореянинг LG савдо белгиси томонидан эълон қилинган, 2015 йилнинг сўнгги чорагига оид ҳисоботда компаниянинг шу йилда 59.7 миллион дона смартфон сотгани қайд этилган. 2014 йил билан солиштирганда бу 600 минг донага кўп.