Дунёдаги илк 240 Вт тезликда зарядланадиган смартфон қачон тақдим қилиниши маълум бўлди

Дунёдаги илк 240 Вт тезликда зарядланадиган смартфон қачон тақдим қилиниши маълум бўлди

Кўпчилигимизга смартфон қуввати тўлиб олишини кутиш ҳолатлари жуда таниш, яъни уларни қувватлаш учун кетадиган бир неча соат вақт ҳам кўплик қиладигандек гўё. Қурилмани туни билан зарядланишда қолдириш эса қайсидир томондан зарарли жиҳатларга эга ва бу ечим бўла олмайди. Ҳайриятки, смартфон ишлаб чиқарувчилари ўз телефонларининг қувватланиш вақтини янги технологиялар билан кундан-кунга қисқартириб келишмоқда. Xiaomi ўтган йили тақдим қилган Redmi Note 12 сериясидаги смартфон ўзининг 210 Вт тезликда зарядланиши билан iQOO брендининг iQOO 11 смартфонини (200 Вт) ортда қолдирди. Бироқ, Xiaomi смартфони рекордни узоқ вақт ушлаб туролмайдиган кўринади. Тез кунда унинг ўрнини янги Realme смартфони эгалланади.

Жорий йил бошида Realme компанияси ўзининг GT Neo 5 смартфонини феврал ойида чиқаришини эълон қилган эди. Қизиғи шундаки, бўлажак смартфон мисли кўринмаган қувватланиш тезлиги – 240 ваттни қўллаб-қувватлайди.

Йўқ, сиз ҳеч нарсани ўтказиб юбормадингиз. Сўнгги марта Realme GT Neo 3 смартфонларини чиқарган эди. GT Neo 5 чиқарилиши тасдиқланиши билан компания 4 серияни ташлаб кетаётганлигини кўриш мумкин. Бунга сабаб "4" рақами Хитойда "омадсиз" ҳисобланади, чунки у "ўлим" сўзига ўхшаб кетади.

Маълум бўлишича, Realme GT Neo 5 икки хил батарея вариантида таклиф қилинади: бири 4,600 мА/соат батарея билан 240 Вт зарядланиш тезлигига эга бўлса, иккинчиси 5,000 мА/соат батарея билан 150 Вт тезкор қувватланишга эга бўлади. Шунингдек, улар ташқи кўриниши бироз фарқ қилиши мумкин, лекин техник хусусиятлар борасида ўзгаришлар бўлмаслиги айтилмоқда.

Realme GT Neo 5 ҳақида тарқатилган аввалги маълумотларга кўра, смартфон Snapdragon 8+ Gen 1 чипсетида 8ГБ/12ГБ/16ГБ оператив ва 128ГБ/256ГБ/512ГБ/1ТБ доимий хотира билан Android 13'га асосланган Realme UI 4.0 операцион тизимида ишлайди. Унинг 6.74 дюйм ва 2772×1240 резолюцияли OLED дисплейи 144 герц янгиланиш тезлигига эга. Камералар борасида қурилма 50МП асосий, 8МП ултра-кенг ва 2МП макро, ҳамда, 16 МП олд камера билан жиҳозланган бўлади.

Realme вице-президенти GT Neo 5 смартфонининг 240 Вт зарядланиши тезлиги ҳақида

Realme вице-президенти Сюй Қи ўзининг Weibo саҳифасида шундай саволни ўртага ташлади: "Телефоннинг батареяси тўсатдан тугаб қолди, бир соатлик "Hurricane"ни онлайн томоша қилишни қўллаб-қувватлаш учун Neo 5 смартфонини заряд қилиш учун қанча вақт кетади?" Жавоб сизни ҳайратга солиши аниқ: 30 сония

Realme GT Neo 5 смартфони расман 9 феврал куни Хитойда тақдим қилиниши кутилмоқда.

ЎҚИНГ: Nothing'нинг иккинчи смартфони Америкада тақдим қилинади

Terabayt.uz сайтининг видеолари: Youtube'даги каналимизда!