DxOMark Mi Mix 2S камерасига баҳо берди
Xiaomi компанияси 27 март куни жаҳон смартфон фойдаланувчилари диққатига 12 мегпиксел аниқлигида сурат олувчи, шунингдек оптик яқинлаштириш функцияси жорий қилинган қўш сенсорли бош камера модуллари жойлаштирилган ва Mi Mix 2'нинг авлоди — Mi Mix 2S флагманини тақдим қилди.
Мазкур хитойлик смартфонни тайёрлаш "рецепти" ғоятда оддий: «оригинал Mi Mix 2 + Snapdragon 845 + янги камералар = Mi Mix 2S».
Флагманни яратиш бўйича бирламчи концепция ўзгармаган, яъни Xiaomi Mi Mix 2S ромсизлик трендининг давомчиси ҳисобланади.
Mi Mix 2S смартфони DxOMark компаниясининг лабораториясида бўлиб, обдон синовлардан ўтказилди ҳамда жаҳоннинг энг яхши камерафонлари рейтингидан ҳам ўрин эгаллади.
DxOMark экспертлари хулосасига кўра, Xiaomi брендининг ушбу алоқа воситаси энг яхши сурат олишда жаҳоннинг "5-рақамли" гаджети экан.
Xiaomi Mi Mix 2S модели бош камерасида 2 та сенсор мавжуд:
12 мегапикселли Sony IMX363 модули оптик барқарорлаштириш функциясига эга бўлган;
Яна бир 12 мегапикселли камера модули учун танланган Samsung S5K3M3 сенсори телеобъектив вазифасини бажаради ва унга 2 карралик яқинлаштириш функцияси жорий қилинган.
Xiaomi Mi Mix 2S флагманининг бош камерасидаги "шовқинни" йўқотиш ҳамда автофокусни аниқ белгилаш алгоритмлари DxOMark мутахассисларини ҳайратда қолдирган.
Боиси, бу жиҳат смартфонга фотосурат олиш йўналишида 101 балл тўплашга ёрдам берган, яъни бу борада унинг натижаси Samsung Galaxy S9+ моделидан 3 баллга пастроқ.
DxOMark мутахассисларининг гувоҳлик беришича, Mi Mix 2S бош камерасининг рангларни ифодалай олиш ҳамда автофокуслаш бўйича имкониятлари Galaxy S9+ моделидан ҳам юқори экан.
Xiaomi Mi Mix 2S девайсининг олд камера ҳам илғор ва унда "сунъий ақл" технологияси татбиқ этилган бўлиб, унинг ёрдамида смартфонни юз-қиёфа орқали блокировкадан чиқариш мумкин.
Видео тасвирга олиш бўйича Xiaomi Mi Mix 2S бир оз камтарлик қилган ва 88 балл тўплаган.
Mi Mix 2S бош камерасининг имкониятлари умумий жиҳатдан DxOMark томонидан 97 баллга баҳоланган. Шу тахлит бу смартфон сурат олишда iPhone X ҳамда Mate 10 Pro билан бир сафда турибди. Улардан олдинда эса Huawei P20 Pro, Huawei P20, Galaxy S9+, Pixel 2 XL флагманлари бор.
Ўқинг: Xiaomi Mi Mix 2S флагмани тақдим қилинди
Mi Mix 2S баҳоси $527 долларга баҳоланганини инобатга олсак, унинг бундай илғор камерага эга бўлгани таҳсинга лойиқ.
