Эҳтиёт бўлинг: СМАРТФОН

Эҳтиёт бўлинг: СМАРТФОН

Greenbot.com сайти смартфонлардан ҳаддан ташқари кўп фойдаланиш натижасида юзага келиши мумкин бўлган жисмоний зарарлар ҳақида маълумот берди. Қуйида уларнинг энг асосийларини келтириб ўтамиз.

Бармоқларнинг толиқиши
Смартфонда жуда кўп ёзиш бармоқларнинг толиқишига, қизаришига, уларда босиқлар пайдо бўлишига, оқибатда бармоқ учларининг қотишига олиб келиши мумкин. Бу эса, албатта, инсон организми учун зарарлидир. Бунинг олдини олиш учун мутахассислар смартфондан меъёрида фойдаланишни тавсия қиладилар.

Бўйин оғриғи
Смартфонга узоқ вақт қараш бўйиннинг оғришига сабаб бўлади. Чунки ҳар гал смартфонга қараш вақтида бўйинни эгишга тўғри келади. Нью Йорклик жарроҳ Кеннет Хансраж бўйинни 45 градусга эгиш унга тахминан 23-24 кг куч билан таъсир қилишини ва бу ўз навбатида бўйин ва умуртқа поғонасининг оғришига олиб келишини қайд этади. Бунинг олдини олиш учун смартфонни кўз баландлигида ушлашга ҳаракат қилиш керак. Шунда бу каби оғриқларнинг келиб чиқиши бартараф этилади.

Бел оғриғи
2013 йилда ўтказилган тадқиқотлар шуни кўрсатдики, 18 ва 24 ёш оралиғида бўлган Британиядаги ёшларнинг 84 фоизи бел оғриғидан нолиган. Ҳа, тўғри ўқидингиз – 84 фоиз! Смартфондан қадни нотўғри ҳолатда тутган ҳолда ҳаддан зиёд кўп вақт давомида фойдаланиш бунинг асосий сабаби сифатида кўрсатилган. Албатта, бунинг олдини олиш учун қаддингизни тўғри ҳолатда тутиш тавсия этилади.

Кўзнинг зўриқиши
Баъзида телефондаги ёзув, видео ёки бошқа файлларга берилиб қараш натижасида кўзларни меъёридан кам юмиб очамиз. Бу эса кўзларнинг зўриқишига сабаб бўлиши мумкин. Шунинг учун телефонда бирор нарсани томоша қилаётган вақтда кўзларни тез-тез юмиб-очиш бу каби кўз зўриқишларининг олдини олади.

Кўз касалликлари
Смартфондан танаффуссиз кўп фойдаланиш охир-оқибатда баъзи инсонларда кўз касалликлари келтириб чиқариши мумкин. Ғарб офтольмологларининг берган маълумотга асосан, смартфон экранидан чиқадиган кўк-бинафша нурлар макуляр дегенерацияга сабаб бўлиши мумкин. Кичик экранли телефон экранларига узоқ муддат тикилиб қараш эса кўзларнинг толиқишига ва оддий ҳолатда предметларнинг хира кўринишига олиб келаркан. Буларнинг олдини олиш учун экран ёрқинлигини пасайтириш, шрифт ҳажмини катталаштириш ва тез-тез смартфондан танаффус олиш тавсия қилинади.

Албатта, бугунги кунда смартфон кўпчилик учун ажралмас ҳамроҳга айланиб улгурган. Унинг алоқа ва мулоқотдаги афзалликлари ҳақида гапириш ортиқча. Аммо ундан ҳаддан ортиқ даражада кўп фойдаланиш инсон саломатлигига таъсир қилмасдан қолмайди. Шунинг учун смартфондан фойдаланишни маълум меъёрга келтириш, шубҳасиз, фойдадан холи бўлмайди.

Terabayt.uz сайтининг видеолари: Youtube'даги каналимизда!