Экрани «тирқиш»ли Galaxy S10 яна икки жиҳатига кўра рекорд ўрнатяпти!
Samsung яқинда ўзининг Galaxy A8s смартфони биринчи «тешик»ли Infinity-O дисплейга эга бўлишини маълум қилганди. Аммо хитойлик рақиби ундан илгарилаб кетгани ҳақида ҳам ёзганмиз.
Энди эса интернетда компаниянинг навбатдаги флагмани – Galaxy S10 дизайнини қисман акс эттирувчи сурат тарқалди. Унга кўра, ушбу смартфон ҳам худди Galaxy A8s сингари, дисплейининг юқори чап бурчагида «тирқиш»ли экан.
Манбаларнинг хабар беришича, олд камера учун Galaxy A8s экранида «очилган тирқиш» 6,7 миллиметрлик ўлчамга эга. Galaxy S10 моделида эса ундан 2-3 миллиметрга ихчамроқ «тешик» бўлади. Аммо флагманнинг бир неча талқинда чиқаётганини ҳисобга олсак, улардан қай бири Infinity-O дизайнига эга бўлиши ҳозирча номаълум. Бу текис экранли, нисбатан арзон Galaxy S10’да бўлиши аниқ, дейишяпти; тағин бошқа версияларига ҳам жорий этилиши мумкин.
Шунингдек, кеча инсайдерлар берган хабарга кўра, Samsung Galaxy S10’нинг энг илғор конфигурацияли модели яна бир жиҳатдан рекорд ўрнатяпти. Яъни, у тезкор хотирасининг ҳажми 12 гигабайтни ташкил этувчи дунёдаги илк смартфон бўлади! Айни дамда эса бу борада етакчи Xiaomi Mi Mix 3 модели бўлиб турибди.
Аммо Galaxy S10’нинг рекорди унинг 12 гигабайтлик «оперативка»си билангина чекланиб қолмайди. Манбага кўра, ушбу флагманнинг доимий хотираси ҳам мисли кўрилмаган даражада – нақ 1 терабайтлик ҳажмга эга! Айтиш керакки, жанубий кореялик техногигант яқинда бутун бошли iPad нархида янги, рекорд ҳажмли microSD-карта чиқарган эди.
Булардан ташқари, айни шу модел 5G-модулга ҳамда тўртта объективли асосий камерага ҳам эга бўлиши кутилмоқда. Samsung мазкур флагманини ҳали расман тақдим этилмаган, аммо AnTuTu’да мутлақ рекорд ўрнатган Snapdragon 8150 процессори билан чиқариши ҳам аллақачон маълум.
Эслатиб ўтамиз, ушбу компаниянинг турли русумлардаги смартфонларини Terashop.uz интернет дўконимизда 899 000 сўмдан бошланган нархларда харид қилиш мумкин.
