ЭКСКЛЮЗИВ: Мутлақо ромсиз Xiaomi Mi Mix 3’ни илк «жонли» суратда кўрамиз! (+видео)
Бугунги кунда авж олган ромсиз дизайн трендига 2016 йили айнан Xiaomi компанияси, биринчи авлод Mi Mix смартфони билан асос солганини айримлар билмаса ҳам керак. Mi Mix 2 ўтган йилнинг сентябрида, унинг янгиланган версияси – Mi Mix 2s эса 2018 йилнинг мартида тақдим этилган. Демак, навбат учинчи авлод Mi Mix смартфонига келди...
ЎҚИНГ: Xiaomi Mi Mix 3'да "ғалати ўзгариш" бўлади
Интернет кенгликларига Xiaomi Mi Mix 3 смартфонининг биринчи «жонли» расмини чиқаришди. Бу моделда «ўйиқ»сиз дисплей корпуснинг олд юзасини буткул қоплаган. Мана, кўринг-да:
Олдинги авлод Mi Mix қурилмаларининг экрани икки ёнида ўта юпқа ҳошия ва пастида энсиз ромга эга эди. Аммо уларнинг учинчи авлодида дисплейнинг ҳар тўртала томонида бир хил юпқа ҳошиягина мавжуд.
Хўш, унда Xiaomi олд камерани қаерга жойлаяпти экан? Афтидан, «хитойча Apple» ҳам ўз юртдошларидан ўрнак олиб, селфи учун корпус ичидан чиқувчи камера қўлламоқчи.
Айни дамгача Vivo ҳамда Oppo шундай камерали смартфонларини расман тақдим этишган.
ЎҚИНГ: Xiaomi Mi Mix 3 – ҳақиқий ромсиз флагман сирлари ошкор бўлди
Янги смартфоннинг орқа панели эса Mi Mix 2S моделидаги сингари бўлиши кутилмоқда: керамик корпус, юқори чап бурчакда тикка жойлашган қўшалоқ корпус, пастроқда – орқа қопқоқ ўртасида эса дактилоскопик сенсор. Буни ҳали ўтган йилнинг охиридаёқ интернетга чиққан қуйидаги сурат ҳам исботламоқда:
2018 йилдаги аксарият флагманлар қатори, Mi Mix 3 ҳам Qualcomm’нинг илғор Snapdragon 845 процессори ўрнатилишини кутиш мумкин. Кузатувчилар унинг 8 гигабайтлик тезкор ва 256 гигабайтлик доимий хотирага эга бўлишини айтишаётир. Xiaomi бу девайсини йилнинг охирроғида тақдим этишини ҳисобга олсак, у бирйўла Android 9.0 P базасидаги MIUI прошивкаси билан чиқса керак.
ЎҚИНГ: Тўлиқ рўйхат: Xiaomi бу йил яна қандай смартфонлар тақдим этади?
Бу орада Xiaomi фанатлари бўлган дизайнерлар аллақачон Mi Mix 3 флагманининг рендер суратларини тайёрлашга тушиб кетишган. Ҳатто бу модел ҳақидаги маълумотларга таянган ҳолда унинг видеосини ҳам тайёрлаб, интернетга чиқаришган:
Тўғри, компания ҳозирча Mi Mix флагмани ва унинг тақдимот санаси ҳақида бирор расмий маълумот бермаган. Аммо бултурги Mi Mix 2 модели сентябрда намойиш қилинганидан келиб чиқиб, унинг учинчи авлодини ҳам шу ойда кутишимиз ўринли.
Xiaomi бунгача бозорга чиқарган аксарият телефонлар эса Ўзбекистонда ҳам бир йиллик расмий кафолат билан сотиляпти.
