Эксклюзив: «салкам флагман» Galaxy A8 ва A8+ смартфонларини видеода томоша қиламиз!
Samsung’нинг 2018 йилги Galaxy A8 ҳамда A8+ моделлари тақдимотигача ҳали бирмунча фурсат бор, аммо уларнинг хусусиятлари ҳақида деярли ҳамма маълумотлар чиқиб бўлган. Бироқ барибир кунда-кунора улар тўғрисида бирор қизиқарли хабар учраб турибди.
ЎҚИНГ: Кутилмаган Galaxy A8 (2018): унга ҳатто Galaxy S8 ва Note 8 эгалари ҳам ҳавас қилишлари тайин!
Жумладан, хитойлик инсайдер ушбу смартфонлар видеотавсифини тайёрлаб, интернетда тарқатиб юборган. Унда қурилмалар батафсил тасвирланган бўлиб, энди уларнинг «салкам флагман» хусусиятларига эга эканлигига шубҳа ҳам қолмаган.
Мана, биргаликда томоша қиламиз:
Чиндан ҳам, жанубий кореялик гигантнинг Galaxy A8 ҳамда A8+ моделлари аввал тарқалган суратларда акс эттирилганидек кўринишга эга. Фақат бу гал видеонинг ўзи ҳам бирмунча профессионал даражада суратга олинган.
Шунингдек, янги девайсларнинг айрим техник хусусиятлари ҳам тасдиқланган: Exynos 7885 процессори, 4 ГБ тезкор ва 32 ГБ ички хотира, 3000/3500 мА/соат сиғимли аккумулятор.
Булардан ташқари, иккала модел ҳам юзни таниш технологиясига эга; бунақа ечим аввал Samsung’нинг фақат флагман смартфонларида учрар эди. Шу билан бирга, гаджетларда дактилоскопик сканер ҳам қолдирилган – у орқа панелдаги асосий камера остидан ўрин олган.
Samsung Galaxy A8 ва A8+ смартфонларининг бошқа жиҳатлари билан эса олдинги хабар ва мақолаларимизда танишишингиз мумкин.
ЎҚИНГ: Samsung бехосдан Galaxy A8 ва A8+ сирларини расмий сайтида «сотиб қўйди»
