ЭКСКЛЮЗИВ ВИДЕО: энг инновацион ва рекордчи ромсиз смартфонни тажрибада тирнаб, ёндириб, букиб кўришди
Яқинда тақдим этилган Vivo Nex S смартфони бир қатор янгича инновацияларни ўзида жамлаган. Жумладан, унинг бармоқ изи сканери ҳамда сўзлашув динамиги мутлақо ромсиз экраннинг ўзига жойланган, олд камераси эса корпус ичига яширилган.
Табиийки, янгича конструкцияга эга смартфоннинг чидамлилиги қай даражада эканлиги кишини ўйлантиради. Бахтимизга, янги қурилмаларни ўз дроп-тестларида синаб кўриб, бу каби хавотирларнинг қанчалик асосли эканлигини аниқлаштирувчи видеоблогерлар бор.
Жумладан, JerryRigEverything номли машҳур YouTube-канал муаллифи Зак Нильсон бу борадаги бир қатор тажрибалари билан танилган. Vivo Nex S смартфонининг синови акс этган илк видеолавҳани ҳам у тақдим қилди:
Корпуснинг юқори қиррасидан сурилиб чиқувчи селфи-камера – Vivo Nex S моделининг асосий ўзига хослигидир. Айнан шу механизмнинг мустаҳкамлиги кўпроқ хавотирларга сабаб бўлади. Видеоблогер Зак Нильсон унинг устида тажриба ўтказиб кўриб, корпусдан чиққан пайти ҳам камера маҳкам эканини аниқлади. Агарда бу механизм устига озроқ босилса, яна қайтиб чиқар; қаттиқроқ босилса – корпус ичига «яшириниб» олар экан.
Шунингдек, бошқа бирорта смартфонда учрамайдиган ёндашув – Vivo Nex S сўзлашув динамиги ҳам экран остига жойланган. JerryRigEverything канали муаллифи унинг овоз баландлигини ҳам текшириб кўрган. Мазкур инновацион динамик таққослаб кўрилганида, iPhone 8’даги анъанавий динамикдан кўра пастроқ овоз чиқариши аниқланган.
ЎҚИНГ: Динамиксиз смартфон: у қандай бўлади?
Vivo Nex S инновацияларидан яна бири – дисплей остига жойланган дактилоскопик датчикдир. Тажрибадан кўрамизки, экран усти тиғ билан чизиб ташланган тақдирда ҳам бармоқ изи сканери муаммосиз ишлайверади.
Анъаналардан чекинган ҳолда, Vivo Nex S моделида SIM-карталар уячаси корпуснинг пастки қиррасига ўрнатилган. Уни чиқариш тирқишчасини микрофон билан адаштириб юбориш ҳам ҳеч гапмас. Айнан шунинг учун ҳам смартфоннинг микрофони тирқишнинг ичида одатдагидан бошқачароқ – бурчак остида ўрнатилган. Яъни, адашиб унга игнани тиқиб юборсангиз ҳам микрофонни шикастлаб қўйишингиз қийин.
Зак Нильсон ушбу смартфоннинг экранига олов тутиб, корпусини букишга уриниб ҳам кўрган ва Vivo Nex S бу жиҳатларига кўра ҳам мустаҳкам эканлигига ишонч ҳосил қилган.
