ЭКСКЛЮЗИВ ВИДЕО: iPhone XS Max ва Galaxy Note 9 тезкорлигини таққослаймиз!
Apple корпорацияси 12 сентябрдаги матбуот анжуманида тақдим этган янги iPhone’лар дизайнига кўра ўтган йилги юбилей суперфлагманидан унча фарқ қилмайди. Аммо уларнинг автономлиги, ишлаш самарадорлиги анча ортган.
ЎҚИНГ: iPhone XS флагмани AnTuTu’да шунчаки мўъжиза кўрсатди!
Майли, бенчмарклардаги синтетик тестлар ўз йўлига, хўш, амалда уларнинг тезкорлиги қанақа? GizmoSlipTech никли блогер шунга қизиқиб, купертиноликларнинг iPhone XS Max ҳамда жанубий кореяликларнинг Galaxy Note 9 флагманларини ишлаш тезлиги бўйича солиштириб кўрди. Синовлар жараёни ва натижаларини эса ўзининг YouTube-каналида эълон қилди.
Буни қарангки, ушбу беллашувда мутлақ ғолибни аниқлаш имкони бўлмади. Кундалик ишлатиладиган оммабоп иловалар – YouTube, Instagram, Twitter кабиларнинг юкланиш тезлиги бўйича Galaxy Note 9 фаблети олдинда. Айрим ҳолларда сониянинг ҳам митти улуши қадар бўлса-да, у иловаларни тезроқ очган. Мана, қуйидаги тасвирда бу икки смартфон ҳар бир иловани қанчалик вақтда ишга тушира олгани кўрсатилган:
Англаганингиздек, сариқ тусли чизиқларда Samsung, мовий рангли чизиқларда эса Apple флагманларининг натижалари кўрсатилган.
ЎҚИНГ: ЭКСКЛЮЗИВ ВИДЕО: iPhone XS ва iPhone XS Max’нинг илк дроп-тести!
Видеоблогер эълон қилган тестда iPhone XS Max ҳамда Galaxy Note 9 смартфонлари «оғир» ўйинларда ҳам синаб кўрилган. Бунда Fornite, PUBG, Hearthstone каби уч ўлчамли ўйинларнинг ҳар икки флагманда юкланиш вақти ҳисобга олинган. Кундалик иловаларда рақибига бой берган iPhone XS Max мазкур тестда яққол устунликка эришган:
Таъкидлаш керакки, iPhone XS Max моделининг тезкор хотираси ҳажми атиги 4 гигабайтни ташкил этади. Синовда қатнашган Samsung Galaxy Note 9 версияси эса ундан нақ икки карра катта ҳажмли тезкор хотирага эга. Шундай бўлса-да, купертиноликларнинг флагмани очилган иловаларни фон режимида ушлаб туриб, уларга тезкорлик билан қайта олган. Жанубий кореяликларнинг фаблети эса охирги очилган иловаларга ўтишда уларни ҳар гал қайтадан юклаган.
Мана, қуйидаги видеолавҳада ушбу икки флагманнинг синов жараёнига ўзингиз гувоҳ бўлишингиз мумкин:
Хуллас, ушбу «жанг»да мутлақ ғолиб аниқланмади, бу икки рақибнинг «олишув»ларини ҳам кузатамиз, биздан узоқлашманг.
Эслатиб ўтамиз, Terashop.uz интернет-дўконимизда бир қатор моделлардаги Apple iPhone ҳамда Samsung Galaxy смартфонларини онлайн харид қилишингиз мумкин. Бунда ўзингизга қулай усулда тўлов қилиш, харидингиз Ўзбекистон бўйича бепул элтиб берилиши каби имкониятлар сизга манзур келади.
