Элон Маск Марсни термоядровий бомбалар ёрдамида «иситиш»ни таклиф қилди
Tesla ва SpaceX раҳбари Элон Маскнинг фикрича, Марсни бир неча йўл билан мустамлака қилиш мумкин, бироқ бу йўллар ичида энг тезкори — термоядровий бомбаларни қўллашдир. Motherboard хабарига кўра, у бу ҳақда Стивен Кольбернинг Late Show юмористик теледастурида айтиб ўтган.
Интервью давомида бошловчи Стивен Кольбер Маскнинг «суперёвуз» эканлигини таъкидлади, Маскнинг ўзи буни рад этиб, шунчаки «фойдали ишлар» қилмоқчи эканлигини айтиб ўтди. Бунга далил сифатида ишбилармон, ҳозирча яшашга яроқсиз бўлса-да, Марс сайёрасини мустамлакага айлантириш бўйича ўз режаларини айтиб ўтди.
«Марс меҳмонларни жуда ҳам ёмон кўради, бу ҳақиқат. Бу таъмирланиши керак бўлган сайёрадир. Дастлаб шаффоф гумбазлар остида яшашга тўғри келади, бироқ кейинчалик уни Ерга ўхшаш сайёрага айлантириш мумкин», — деди Элон Маск.
Сайёрани қандай қилиб ўзгартириш мумкинлиги ҳақидаги саволга Маск воқеаларнинг икки хил ривожини келтирди — тезкор ва секин. «Тезкор йўл — Марснинг қутбларига термоядровий бомбалар ташлаш керак. Секин йўл — Ерда қандай қилиб иссиқхона газларини чиқарган бўлсак, шу ишни у ерда такрорлаш керак». SpaceX раҳбари, шунингдек, Марсни микроблар билан тўлдириш каби бошқа вариантларни ҳам айтиб ўтди.
Маскнинг биографияси муаллифи Эшли Вэнс қизил сайёрани эгаллаш учун «биологик транспортация»дан фойдаланиш режалари ҳақида ёзганди. Унга кўра, жониворлар, ўсимликлар ва одамларнинг генетик кодлари Ердан Марсга узатилади ва шу асосда 3D-биопринтер асосида флора ва фауна «чоп этилади».
Марсни эгаллаш бўйича Маскнинг лойиҳаси ҳеч бир жиҳати билан янгилик эмас, бироқ тадбиркор мунтазам равишда ўз режасининг янги тафсилотларини маълум қилиб боради. Февраль ойида SpaceX раҳбари мазкур мавзуга атаб бутун бир китоб ёзмоқчи эканлиги маълум бўлганди.
Маск 2015 йилнинг охирига қадар астронавтлар Марс парвозларида фойдаланиладиган Mars Colonial Transporter космик кемаси ва скафандрларни намойиш этишга ваъда берган. Шунингдек, январь ойида у Ерни Марс билан боғлайдиган йўлдошли интернет тизимини ишлаб чиқиш режаларини эълон қилганди.
