Энди Android қурилмангизда қўнғироқларни ёзиб ололмайсиз
Android операцион тизими ёки унга асосланган OneUI, MIUI, ColorOSқобиқлари ўзларининг телефон иловаларида ички ўрнатилган қўнғироқларни ёзиб олиш хусусиятига эга, аммо улар айрим мамлакатлар қонунлари сабаб ҳамма смартфонларда ҳам мавжуд эмас. Шундай экан, фойдаланувчи қайси бренд смартфонини ишлатмасин агар унда қўнғироқларни ёзиб олиш функсияси мавжуд бўлмаса унда у Google Play Store'дан ўзига ёққан учинчи томон қўнғироқларни ёзиб олиш иловаларини ўрнатиб олиши мумкин, эди. Эндиликда Google ўзининг иловалар дўкони сиёсатига ўзгартиришлар киритмоқда ва келаётган 11 майдан бошлаб компания барча учинчи томон қўнғироқларни ёзиб олиш иловаларини бутунлай блоклайди.
Илк маротаба Гоогле хавфсизлик ва махфийлик сабаб Android версияси 6.0 дан бошлаб қўнғироқларни ёзиб олиш учун расмий API'ни дастурчилар ўзларининг иловаларида қўлламасликлари учун ёпиб қўйган эди. Ундан кейин ҳам, гарчи компания Android 9.0 да бир неча айланма йўлларни ва Android 10 версиясида эса микрофон орқали қўнғироқларни ёзиб олишни ҳам тўсиб қўйишига қарамай, дастурчилар Android'нинг Accessibility хизматлари орқали ўз иловаларида қўнғироқларни ёзиб олишни тақдим қилишаётган эди. Ана энди Google ўзининг Accessibility API'ини қўнғироқларни ёзиб олиш учун мўлжалланмаганлигини ва унинг учун талаб қилинмаслиги кераклигини маълум қилди ва бу Play Store дўконидаги қўнғироқларни ёзиб олиш иловалар учун сўнгги манзил бўлади.
Маълум қилинишича, янги қоидалар фақат учинчи томон иловалари учун амал қилади ва юқорида айтиб ўтилган Samsung, Pixel, Xiaomi ва Oppo смартфонлариникидек ички ўрнатилган қўнғироқларни ёзиш хусусиятлари бундан мустасно.
ЎҚИНГ: Netflix яқин ўн йилда бунчалик кўп обуначи йўқотмаган
