Энди Apple’нинг ўзини ўғирликда айблашмоқда!
Купертинолик гигант ўз маҳсулотларига дизайн бўйича ўхшаш бўлиб қолган гаджетлар ишлаб чиқарган компаниялар билан судлашиб юришидан хабарингиз бор. Аммо навбатдаги можарода Apple даъвогар эмас, балки айбланувчи бўлиб чиқяпти!
ЎҚИНГ: Apple ва Xiaomi судлашмоқда: қайси гаджет дизайни ўғирланди?
Жорий йилнинг 4 июнида WWDC анжуманида купертинолик гигант Siri овозли ёрдамчисининг янги – Shortcuts функциясини тақдим этган эди. Лекин унинг белгичаси битта стартапнинг логотипига жуда ўхшаш бўлиб чиқди, деб ёзади 9to5Mac.
Блокчейн-технологиялар ёрдамида сайт яратувчи Shift компанияси фикрича, Тим Кук корпорацияси уларнинг логотипини ўғирлаб олган. Улар бунинг учун компенсация сифатида Apple’дан 200 минг АҚШ доллари талаб қилишмоқда. Стартапчиларга кўра, компания ребрендинги учун айнан шунча миқдорда маблағ керак бўлади.
Shift вакилларининг ҳисоблашларича, Siri Shortcuts логотипининг пайдо бўлиши бозорда чалкашликни келтириб чиқаради. Компания ўзининг рекламаси учун анча-мунча маблағ сарфлаб қўйган ва логотипи уларни тамсил этади. Стартап юристларининг фикрича, логотип Shift компаниясининг муҳим номоддий активи бўлиб улгурган. Компания Apple билан келишувга эришиб, пул кўринишида компенсация олишга умид қилаётир.
Шу ўринда кузатувчилар ҳар иккала логотипни ўзаро таққослаб кўриб, улар унчалик ўхшаш эмаслигини таъкидлашаётир. Кўпчиликнинг фикрича, Shift шунчаки аввал унчалик машҳур бўлмаган компанияни шу усул билан қўшимча реклама қилишга интилмоқда.
ЎҚИНГ: Samsung ва Apple можароси бўйича суд: мағлуб томон 539 миллион долларга тушди!
