Энди Instagram'да ҳам Telegram'даги каби каналлар бўлади

Энди Instagram'да ҳам Telegram'даги каби каналлар бўлади

Meta компанияси ўзининг Instagram ижтимоий тармоғига Telegram мессенжерида бўлгани каби "канал" хусусиятини қўшмоқда. Бу ҳақда Марк Цукерберг ўзининг ана шундай Instagram каналида хабар берди (The Verge орқали).

Маълум бўлишича, янги функция билан контент яратувчилар ўз эълонларини янада кўпроқ аудиторияга етказа олишади. Худди Telegram каналлари каби фақат канал администраторигина унга пост қўя олади. Каналга қўшилган фойдаланувчилар эса уларга реаксия билдиришлари ёки сўровномаларда овоз беришлари мумкин бўлади.

Бундан ташқари каналлар "меҳмонлар билан ҳамкорликлар"ни, ҳамда, АМА (Ask me anything) кабиларни қўллаб-қувватлайди. Сиз ўз каналингизни профил лентангиз юқорисига қадаб қўйишингиз мумкин бўлади. Каналлар барча кузатувчиларингиз учун бепул ва очиқ бўлади, шу билан бирга, уни фақат пул тўлаган обуначиларингизгагина эксклюзив қилишингиз мумкин.

Цукерберг каналига тўхталадиган бўлсак, у Meta Channel 📢 (Meta канали) деб номланади ва эндиликда у ерда Meta'нинг маҳсулотлари ва технологиялари ҳақидаги янгиликлар биринчи бўлиб эълон қилинади.

Каналлар ҳозирда фақат Instagram'нинг мобил қурилмалар учун иловасида мавжуд. Келаётган ойларда эса у Messenger ва Facebook иловаларига қўшилиши кутилмоқда. Ҳозирда функция фақат саноқли контент яратувчилар гуруҳи билан синовдан ўтказилмоқда.

ЎҚИНГ: One UI 5.1 версиясига янгиланган ва янгиланиши кутилаётган смартфонлар рўйхати

Хабарларни тез ва осон ўқиш учун Андроид иловамизни сақлаб олинг.