Энди Plus ёки Telegraph мессенжерларида тўғридан-тўғри аккаунт оча олмайсиз
Telegram мессенжери очиқ кодли бўлганлиги учун исталган илова яратувчилари унинг API'и ёрдамида ўзларининг учинчи томон мессенжерларини яратиб олишлари мумкин. Масалан, Ўзбекистонда Plus ва Graph Messenger (Telegraph) номли ана шундай мессенжерлар расмий Telegram'га қараганда кўпроқ функционаллиги билан анча оммалашган. Бироқ, тез кунда сиз уларда янги аккаунт оча олмайсиз.
Telegram API фойдаланувчилари хизматнинг навбатдаги янгиланиши ҳақидаги хабарни қабул қилишди. Унга кўра жорий йилнинг 18 феврал санасидан бошлаб "ташқи иловаларда аккаунтига кирадиган фойдаланувчилар логин кодларини фақат Telegram орқали қабул қила олади" ёхуд энди сиз Telegram'нинг компютер ва веб иловаларида бўлгани каби учинчи томон Telegram клиентларида ҳам аккаунтингизга кириш учун SMS-код сўрай олмайсиз.
Ҳозирда Telegram фақат янги аккаунт очишда ёки аввал очилган Telegram аккаунт ҳеч қайси қурилмада мавжуд бўлмаганида телефон рақамга SMS-код юбориши мумкин. Сўнгги Telegram API янгиланиши эса сиз Plus ва Graph Messenger'ларида тўғридан-тўғри янги аккаунт оча олмаслигингизни англатади. Бунинг учун сиз аввал расмий Telegram иловаси орқали аккаунт очишингиз, кейин эса учинчи томон иловасига "логин" қилишингиз мумкин бўлади.
"Бу ўзгаришлар 18.02.2023 13:00 UTC да кучга киришидан олдин уларни акс эттириш учун иловангизнинг ҳисобга кириш ва регистрация интерфейсларини янгилашингизни сўраймиз", дейди Telegram ўзининг API фойдаланувчиларига.
Telegram'нинг қўшимча қилишича, бу ўзгариш фойдаланувчиларга "сезиларли таъсир қилмайди", чунки учинчи томон Telegram клиенти фойдаланувчиларининг кўпчилиги расмий Telegram иловасидан ҳам фойдаланади. Келгуси ойларда Telegram аккаунтга кириш жараёнини соддалаштиришга ёрдам берадиган янги хусусиятларни таклиф қилиши кутилмоқда.
ЎҚИНГ: Twitter'да энди янада кўпроқ сўзлар билан пост ёзиш мумкин
