Энди YouTube'га ҳам юзернеймлар қўшилмоқда
Деярли барча ижтимоий тармоқ ёки мессенжерлар фойдаланувчиларга бир-бирларини топишда ёки ўз шахсларини шакллантиришда ёрдам берадиган @username (юзернейм ёки фойдаланувчи номи) хусусиятига эга. Фойдаланувчи номлари ноёб бўлиб, улар бир-бирини такрорламайди. Эндиликда, YouTube ҳам ўз платформасига ана шундай функцияни қўшаётганлигини эълон қилди.
Маълум бўлишича, ҳар бир YouTube фойдаланувчиси ўзларининг махсус номларига эга бўлишади ва у канал саҳифаларидан тортиб Shorts'гача амал қилади. Юзернеймлар фойдаланувчиларга изоҳларда, пост, видео ёки видео тавсифларида бир-бирларини осон ва тез белгилаш имконини беради. Шунингдек, компаниянинг таъкидлашича, юзернеймлар билан сиз тўғри одам билан мулоқотда эканлигингизга ишонч ҳосил қила оласиз. Қолаверса, юзернеймлар сизнинг URL манзилингиз сифатида ҳам хизмат қилади: масалан, сизнинг юзернейм @user123 бўлса, сизнинг YouTube манзилингиз автоматик равишда https://youtube.com/@user123 бўлади.
Худди Telegram'да бўлганидек, YouTube'да ҳам канал номи алоҳида, унинг юзернейми алоҳида бўлади. Агар YouTube фойдаланувчиси аллақачон ўз канали учун шахсий URL'га эга бўлса, бу автоматик равишда уларнинг юзернеймларига айланади ва албатта, уларни кейинчалик ўзгартириш мумкин бўлади.
YouTube юзернеймлари ушбу ҳафтадан бошлаб аста-секин тарқатилади ва фойдаланувчилар қачон ўзларининг ноёб номларини танлаш мумкин бўлганида YouTube Studio орқали огоҳлантирилишади. Компаниянинг маълум қилишича ҳамма 14 ноябргача ўзининг юзернеймини танлаш имконига эга бўлади.
