Energizer рекордчи смартфон тақдим этди: қуввати нақ олтита iPhone XS Max билан тенг!
Avenir Telecom компанияси Energizer брендли аккумулятор ва турли қувват сақлагичлари билан машҳур. Шунингдек, бу ишлаб чиқарувчи айни шу бренд остида турли смартфонлар ҳам намойиш этиб келаётир.
ЎҚИНГ: MWC 2019 кўргазмасида Energizer нақ 26 моделда янги телефон намойиш этмоқчи!
Унинг кечагина расман тақдим этилган Energizer Power Max P18K Pop смартфони ҳайратланарли даражада сиғимдор – нақ 18 000 мА/соатлик аккумулятори билан мақтана олади. Ахир, бу – салкам олтита iPhone XS Max батареясининг ток сиғимига тенг-да!
Компания вакилларининг таъкидлашларича, тўла аккумуляторининг қуввати билан бу смартфон сўзлашув режимида 90 соат ишлай олади. Шунингдек, у 100 соат мусиқа тинглашга ёки икки кун видео кўришга ҳам етади. Кутиш режимида эса Energizer Power Max P18K Pop эллик кунгача қуввати тугамасдан тура олади! Унинг аккумулятори 18 ваттлик технология орқали тезкор қувватланади.
Energizer Power Max P18K Pop моделининг иккинчи ўзига хослиги эса корпуснинг юқори қиррасидан чиқувчи қўшалоқ селфи-камерасидир. Унга ўрнатилган 16 ва 2 мегапикселлик иккита оптик датчик портрет режимида селфилар олишга имкон беради. Смартфоннинг асосий камераси эса 12 + 5 + 2 мегапикселлик учта объективни ўз ичига олади.
Қолган жиҳатларига келсак, бу смартфоннинг 6,2 дюймлик ромсиз экрани 1080х2340 пикселлик тасвир аниқлигида. Унинг «электрон юраги» эса MediaTek Helio P70 чипи бўлиб, 6/128 гигабайтлик тезкор/доимий хотирага эга.
Energizer брендининг ушбу ишланмаси Android операцион тизимининг энг сўнгги – 9 Pie талқини билан таъминланган. Смартфон корпусининг ўлчамлари 153х74,8х18 миллиметрга тенг. MWC 2019 кўргазмасида кенг оммага расман намойиш этилса-да, Energizer Power Max P18K Pop фақат июнь ойига борибгина савдога чиқарилади. Унинг нархи ҳам MWC 2019 тадбирида маълум қилинади.
ЎҚИНГ: Бунақаси бўлмаган: нақ 16000 мА/соатлик аккумуляторга эга смартфон!
