Энг кучли Android-смартфонлар: топ-учталикни битта компания забт этди!
AnTuTu компанияси самарадорлиги энг юқори бўлган Android-смартфонларнинг янгиланган рейтингини эълон қилди. Мазкур рўйхат 2018 йилнинг 1 январидан 31 январигача бўлган муддатда ушбу бенчмаркда ўтказилган тестлар натижалари асосида тузилган.
ЎҚИНГ: Топ-10: февраль бошида дунё бўйлаб энг оммалашган смартфонлар
Snapdragon 845 ҳамда Exynos 8910 процессорларига асосланган смартфонлар бозорга кириб келиши билан вазият ўта даражада ўзгариши аниқ. Аммо унгача смартфонлар самарадорлиги рейтингида Kirin 970 процессорида ишловчи қурилмалар етакчилик қилмоқда. Ўзиям, Huawei мазкур рўйхатнинг энг юқорисидаги учта ўринни ҳеч кимга бермаган!
Хулласи калом, ҳозирда самарадорлиги энг юқори бўлган смартфон – Mate 10 Pro бўлиб турибди. Huawei’нинг «сунъий идрок» тизимига эга, якка кристалли Kirin 970 процессори билан жиҳозланган ушбу қурилма чиндан ажойиб – яқиндагина у машина бошқаришда ҳам зукколик кўрсатган эди.
ЎҚИНГ: ВИДЕО: Porsche автомобили рулида – Mate 10 Pro смартфони!
Самарадор смартфонлар рейтингининг иккинчи ва учинчи ўринларини тегишлича Huawei Mate 10 ҳамда Honor V10 банд этган; улар ҳам Kirin 970 платформасига эга.
Гувоҳи бўлиб турганингиздек, тўртинчи ва бешинчи поғоналарни якка кристалли Snapdragon 835 тизими билан жиҳозланган OnePlus 5 ва OnePlus 5T девайслари эгаллаган. Олтинчи ўринни ZTE Nubia Z17 олган бўлса, Xiaomi еттинчи ва саккизинчи қаторларни ўзининг Mi 6 ва Mi Mix 2 смартфонлари билан банд қилган; уларнинг иккаласи ҳам Snapdragon 835 процессорида ишлайди.
Буни қарангки, хитойлик смартфонсозлардан ташқари, мазкур рейтингга фақат Samsung кира олган. Унинг Galaxy Note 8 фаблети ва Galaxy S8+ флагмани ўнликнинг охирига зўрға илиниб қолган.
ЎҚИНГ: Топ-10: 2017 йил сўнгида дунёда энг оммалашган смартфонлар
