Энг кучли Redmi смартфони тақдим этилди
Xiaomi компанияси кеча Snapdragon 8+ Gen1 чипли Redmi K50 Ultra смартфонини тақдим этди. Чипсет билан бир қаторда смартфон дисплей техник кўрсаткичлари билан ҳам мақтана олади.
Ушбу қурилмани Redmi K50 Pro ва K50 Gaming моделларининг аралашмаси дейиш мумкин. Xiaomi 12S серияси ва Mix Fold 2 букламафонидан сўнг K50 Ultra модели ҳам Snapdragon 8+ Gen1 чипига эга бўлди.
Чипсет махсус совутиш тизими билан қопланган бўлиб, икки соатдан ошиқ вақт давомида ўйин ўйналса ҳам, у чипни совутиб тура олади. Энг асосийси, тизим кадрни 120fps бўлиб қолишига ёрдам беради. Чип 8/12ГБ LPDDR5 тезкор хотира ҳамда 128/256/512ГБ UFS 3.1 доимий хотира билан боғланади.
Олд томонда 6.67 дюймли AMOLED экран жойлашган. Ушбу 12-битли панель 68,7 миллиард рангни кўрсатиши мумкин. Таққослаш учун, K50 Gaming 10 битли панель, K50 Pro эса 8 битли панелга эга эди. Дисплей HDR10+ ва Dolby Vision технологияларини қўллаб-қувватлайди.
Экран резолюцияси 1,220 х 2,712 пиксел бўлиб, бу FHD+ ва QHD+ резолюцияларининг ўртаси ҳисобланади. Пиксел зичлиги 446ppi ни ташкил қилади. Xiaomi берган маълумотларга кўра, сифат бўйича дисплей QHD+ панеллари билан деярли бир хил, аммо у камроқ смартфон қувватини сарфлайди. Шунингдек, у 120 гертс янгиланиш ҳамда 480 гертс сенсорли намуна олиш частоталарини қўллаб-қувватлайди. Экран остига ўрнатилган бармоқ изи сканери эса юрак уриши тезлигини ҳам аниқлай олади.
Аккумулятор ва қуввланиш бўйича Ultra модель Pro модель билан бир хил, яъни смартфон 120 ваттда қувват олувчи 5,000 мАс сиғимли аккумулятор билан жиҳозланган. Surge P1 чипи эса юқори тезликда қувват олаётган смартфонни назорат қилиб туради.
K50 Ultra камера техник кўрсаткичлари бўйича ҳам K50 Pro моделига ўхшайди. Смартфонга оптик стабилизацияга эга 108МП сенсор ўрнатилган. Камера ичида битта шиша, бешта пластик линзалар ўрнатилган. Бу орқали камера кўпроқ ёрқинликни ўтказа олади. Шу сабабли камера диафрагмаси f/1.6 ни ташкил қилади.
Асосий камера билан бирга 8МП ультракенг ва 2МП макро камералар орқа панелдан ўрин олган. Олд томонда эса IMX596 сенсорли селфи камера жойлашган.
Смартфон 5G тармоғини қўллаб-қувватлайди ҳамда Wi-Fi 6E, NFC ва инфрақизил портига эга. Қурилмадаги стерео динамиклар Dolby Vision функциясини қўллаб-қувватлайди.
Redmi K50 Ultra'нинг нархи 3000 юандан (445 доллар) бошланади. Смартфон қора, кумуш ва кўк рангларда сотилади.
Формула 1 ишқибозлари учун эса махсус версиядаги «Mercedes-AMG PETRONAS Formula One Team Summer Edition» модели тақдим этилган. Ушбу версия чекланган бўлиб, ундан фақат 20,000 дона ишлаб чиқарилади холос.
Смартфоннинг нархи билан қуйида яқиндан танишишингиз мумкин:
8/128ГБ - 3000 юань (тахминан 445 доллар)
8/256ГБ - 3100 юань (тахминан 465 доллар)
12/256ГБ - 3400 юань (тахминан 510 доллар)
12/512ГБ - 3700 юань (тахминан 550 доллар)
12/512ГБ Mercedes F1 версия - 4200 юань (тахминан 625 доллар)
