Энг қиммат флагман DxOMark рейтингида: Samsung бу шармандаликни кўтара олармикан?!. (+видео)
Смартфонларнинг бош камераси ва селфи-камераси бўйича DxOMark’нинг иккита рейтингида ҳам Huawei P40 Pro етакчиликни бермай келяпти. Яқин-яқинларгача Xiaomi Mi 10 Pro ҳамда Oppo Find X2 Pro моделлари 124 балл билан иккинчи ўринда эди, лекин...
ЎҚИНГ: Бу смартфон DxOMark рейтингида Xiaomi ва OPPO’нинг энг зўр флагманларини ортда қолдирди!
DxOMark лабораторияси, ниҳоят, Samsung корпорациясининг энг илғор ва қиммат флагмани – Galaxy S20 Ultra камерасини текшириб бўлиб, натижаларини эълон қилди. Айтиш керакки, 1400 долларлик ушбу смартфоннинг тўртта камераси нақ 100 карралик зумга эга, асосий сенсор эса 108 мегапикселлик. Хўш, бунчалик кучли ва қиммат камерофон профессионал баҳолаш сервиси тестида қандай натижа кўрсатиши керак, сизнингча?
Хоҳ ишонинг, хоҳ ишонманг, лекин Samsung Galaxy S20 Ultra моделининг умумий натижаси атиги 122 баллни ташкил этган! Бунда фотосурат сифати бўйича чакки эмас – 132 балл олган, аммо видеосъёмка имкониятларига кўра атиги 102 балл!
Натижада DxOMark’нинг энг яхши камерофонлар рейтингида Galaxy S20 Ultra бор-йўғи еттинчи ўринга сазовор бўлган. Унинг камера текшируви натижаси Honor V30 Pro билан бир хил даражада. Айтиш керакки, яқиндагина бошқа бир – ўрта нархли смартфони ҳам камера тестида Samsung’ни шарманда қилган эди.
ЎҚИНГ: Galaxy S20 Ultra таннархи ҳисобланди – Samsung уни неча баравар қимматга сотяпти?
Шу тариқа, DxOMark томонидан айни кунгача ўтказилган текширувларга кўра, энг зўр камерофонларнинг рейтинги қуйидагича:
Гувоҳи бўлиб турганингиздек, Huawei P40 Pro (128 балл), Honor 30 Pro+ (125 балл), Oppo Find X2 Pro (124 балл), Xiaomi Mi 10 Pro (124 балл) ҳамда Huawei Mate 30 Pro 5G (123 балл) моделлари Galaxy S20 Ultra’дан юқори ўринларда.
Агарда Samsung Galaxy S20 Ultra камера имкониятларини текшириш натижалари билан батафсил танишишни истасангиз, мана бу ҳавола орқали DxOMark сайтининг тегишли (инглизча) саҳифасига ўтишингиз мумкин.
ЎҚИНГ: Galaxy S20, S20+ ва S20 Ultra’ларнинг барча фарқларини биттада кўриб чиқамиз
