Энг зўр Xiaomi смартфонида оммавий нуқсонлар чиқа бошлади
Хабарингиз бор – жорий иилнинг 13 апрелида «хитойча Apple» ҳамда Black Shark стартапи шу номдаги ўйинбоп смартфонни тақдим этишган. Мазкур қурилма геймерлар учун махсус ишлаб чиқарилганлиги ҳамда ўта бақувватлиги билан ўшандаёқ кўпчиликнинг эътиборини қозонган.
Тақдимотидан кейин унга буюртмалар қабул қилиш бошланди ва бир неча кун ичидаёқ буюртмалар сони миллиондан ошиб кетди. Black Shark бу борада рекорд ўрнатди. Ва ниҳоят, 20 апрелдан ушбу геймерофонни буюртмачиларга етказиб бериш бошланди.
ЎҚИНГ: Xiaomi'нинг Black Shark геймерфони учун рекорд даражада буюртма қабул қилинди
Аммо ҳаммаси шундан кейин бошланди – не-не умидлар билан «Қора Акула»ни қўлига олиб ишлатиб кўрган харидорларнинг ҳафсаласи пир бўлди. Чунки ишлаб чиқарувчи мазкур смартфонини оптимизация қилмаган экан – у кўнгилдагидек ишламаяпти.
Хитойнинг MyDrivers ресурси хабар беришича, Black Shark фойдаланувчилари унинг дисплейи билан боғлиқ муаммоларга дуч келишган. Уларнинг шикоятларига кўра, тачскрин тегинишларни жуда кечикиб сезади, бу эса нафақат ўйинларни ўйнашда, балки интерфейс билан ўзаро алоқани талаб этувчи бошқа иловалардан фойдаланишда ҳам панд бераётир.
Тачскрин ишидаги нуқсон смартфоннинг аппарат ва дастурий қисмлари ўзаро етарлича оптимизация қилинмаганлигидан далолат бермоқда. Муаммонинг кенг кўламда учраётгани эса, айрим смартфонларгина брак чиқмаганлиги, балки бу етишмовчиликлар оммавий тусда эканлигини кўрсатаётир.
Айни дамда Xiaomi харидорларни хавотирланмасликка чақириб баёнот берган. Балки яқин орада Black Shark учун янгиланган прошивка тақдим этилса в шу билан ундаги нуқсонлар бартараф этилса ажабмас.
Айтиш керакки, мазкур геймерофон ҳозирча Ўзбекистон бозорларига етиб келмаган. Аммо «хитойча Apple»нинг бошқа смартфонлари ҳамда бошқа девайслари ўзимизда ҳам расман савдога чиқарилган.
