Эртагаёқ тақдим этиладиган – жаҳонинг энг инновацион смартфонини «жонли» видеода кўрамиз!
Vivo компанияси ўзининг кўплаб инновацион технологияларга эга бўлган янги смартфонини 12 июнда тақдим этмоқчи эканлиги ҳақида ёзганмиз. Ушбу қурилма икки хил версияда бўлиб, улар Vivo Nex ҳамда Vivo Nex S деб аталади.
ЎҚИНГ: Дунёдаги энг инновацион смартфон: «жонли» суратлар, тақдимот санаси ва рекорд нарх!
Расмий намойиши арафасида Vivo Nex моделининг «жонли» видеоси интернетга чиқиб кетди. Унинг олд панелини тўлалигича экран қоплаб олган, селфи-камераси эса корпуснинг юқори қирраси ичидан чиқади. Орқа қопқоғида бўлса модуллари тикка жойлашган қўшалоқ камера кўзга ташланади.
Смартфоннинг дактилоскопик датчиги корпуснинг орқа панелига жойланганини ҳисобга олсак, бу – Vivo Nex моделидир. У якка кристалли Qualcomm Snapdragon 710 процессорига, 6 ГБ тезкор ҳамда 128 ГБ доимий хотирага эга.
Эртага ушбу модел билан бирга Nex S талқини ҳам намойиш этилади; унда бармоқ изи сенсори экраннинг ўзига интеграция қилинади. Шунингдек, мазкур версия энг илғор Snapdragon 845 чипига ҳамда 8 ГБ ҳажмли тезкор хотирага эга бўлади.
