Eurasia Mobile Challenge танловида ғолиб чиққан Ўзбекистоннинг Stolik стартапи онлайн-дўконларда пайдо бўлди
Москвада бўлиб ўтган Eurasia Mobile Challenge (“Евросиё мобил кубоги”) ҳудудий финалида энг кучли учталикга кирган, шунингдек, Барселонада бўлиб ўтган Мобил алоқа жаҳон конгрессида мамлакатимизни тақдим этган Ўзбекистоннинг Stolik стартапи энг оммабоп онлайн-дўконларда фойдаланувчилар юклаб олишлари учун пайдо бўлди. Бу ҳақда Beeline алоқа оператори ахборот хизмати хабар қилди.
“EMC лойиҳасининг мамлакат босқичини ярим йил аввал бошлаган чоғимизда, бизнинг жамоаларимиздан бири илк уринишнинг ўзида жаҳоннинг энг кучли ТОП-20га киришини, рости кутмаган эдик. Лекин ҳақиқат шу: ўзбекистонлик ишлаб чиқарувчилар халқаро даражадаги иловани яратишга қодир экани билан нафақат бизни, балки Евросиёнинг ИТ-соҳасида етук мутахассисларини ҳам ҳайратлантирди”, – деди Unitel`нинг жамоатчилик билан алоқалар хизмати раҳбари Ораз Абдуразаков.
Эслатиб ўтамиз, Eurasia Mobile Challenge танлови VimpelCom компаниясининг “Make Your Mark” лойиҳаси доирасида 2015 йилнинг сентябрь ойида бошланган. Танлов Евросиёда рақамли стартап-экотизимнинг фаол ривожланишига кўмаклашиш, шунингдек янги мобил ечимларни яратиш ва жорий этиш учун техниологик қуроллар билан таъминлашга қаратилган.
Stolik `ни ишлаб чиққан дастурчилар жамоаси капитани Қодир Норов бу ҳақда шундай деди: “Ёш стартапимиз учун бу унутилмас тажриба бўлди: инвесторлар, ишлаб чиқарувчилар, журналистлар билан кўплаб фойдали шартномалар, шунингдек, кўплаб қизиқарли ғоялар ва бизнес-моделлар. Биз тажрибали менторлар билан бизнес-моделимиз ва уни ривожлантириш стратегияси бўйича алоқа ўрнатдик. Ташкилотчилар – Imtiaz ва IE Business School, шунингдек, бизга ажойиб имконият берган танлов ҳомийси VimpelCom компаниясига алоҳида ташаккур. Энг қувонарлиси, танловда иштирок этишимиз иловамизнинг AppStore ва Google Play‘да пайдо бўлган вақтга тўғри келди”.
