Евроиттифоқ ва Хитой 5G тармоғини ривожлантиради
Европа иттифоқи Хитой билан муҳим келишувга эришганлигини эълон қилди. Бу келишувда бешинчи авлод (5G) мобил тармоғи устида ишлаш жараёнини тезлаштириш ва унинг учун технологияларни стандартлаштириш кўзда тутилади.
Келишув шартига кўра Европа Иттифоқи ва Хитой жорий йилнинг охирларига бориб умумий концепция, таянч вазифалар ва 5G-инфратузилмасини ёйиш муддати сингари масалалар кўрсатиб ўтилган ўзаро ҳамфикрлик баёнотини тузиши лозим. Бундан ташқари томонлар ҳамкорликда тадқиқотлар олиб боришни ҳам мўлжаллашмоқда.
Айтиб ўтиш керакки, Европа Иттифоқи Япония ва Жанубий Корея билан бундай келишувга эришиб бўлди. Horizon 2020 ташаббуси доирасида бешинчи авлод мобил алоқаси бўйича тадқиқотларни ривожлантиришга Еврокомиссия 700 млн евро ажратади.
Биринчи 5G тижорий тармоғи 2020 йилда фойдаланишга топширилиши мўлжалланмоқда. Тармоқнинг максимал тезлиги 20 Гбит/с бўлади. Бундай тизим видеохизматларнинг янги авлоди яралишига туртки беради, шунингдек, реал вақтда ишлайдиган инновацион иловалар пайдо бўлади.
5G технологиясини Корея Республикасининг Пхёнчхан шаҳрида 2018 йилнинг 9-25 февралида бўлиб ўтадиган келгуси Қишки Олимпиада ўйинларида амалда намойиш этиш режалаштирилмоқда.
