Exynos 9810 ва стилусли, қулай нархли ярим флагман – Galaxy Note 10 Lite билан танишинг!

DiMaX
1741
04.01.2020 10:24

Samsung компанияси кеча – 3 январь куни – Galaxy S10 Lite ҳамда Galaxy Note 10 Lite моделларини тақдим этган эди. Булардан биринчиси ҳақида мана бу хабаримиздан ўқиб олишингиз мумкин, арзонлаштирилган фаблет ҳақида эса қуйида тўхталиб ўтамиз.

ЎҚИНГ: Ҳа, навбатдаги Galaxy'лар ҳақида адашмаган эканмиз!

Galaxy Note 10 Lite дизайни борасида Samsung кўп ҳам бош қотириб ўтирмаган – унинг ташқи кўриниши Galaxy S10 Lite’дан умуман фарқ қилмайди. Унда ҳам ўша 6,7 дюймлик Super AMOLED дисплей қўлланган, тасвир аниқлиги Full HD+ форматида (2400х1080 пикселлик), олд камера учун юқори қисм ўртасидан тирқиш ўйилган.

Фақат бош камера дизайнида фарқ сезилади: Galaxy S10 Lite моделида у тўртбурчак блокка жойланган бўлса, Note 10 Lite’да квадрат блокда. Шунингдек, камеранинг учта датчиги ва фоточақноқ ушбу квадратнинг бурчакларига ўрнатилган.

Note 10 Lite уч хил – қора, қизил ва оқ корпусларда таклиф этилади. Ўлчамларига келсак, фаблет бўлгани учун барибир сал йирикроқ: 76,1х163,7х8,7 миллиметрлик, вазни эса – 199 грамм. Таққослаш учун келтириб ўтсак, Galaxy S10 Lite ҳажми 75,6х162,5х8,1 мм бўлса, вазни 186 граммни ташкил қилади.

ЎҚИНГ: AnTuTu рейтинги: Samsung, Huawei, MediaTek ва Qualcomm – қай бири энг зўр?

Galaxy Note 10 Lite учун компаниянинг ўз процессори – Exynos 9810 қўлланган, у 6/8 гигабайтлик тезкор хотира билан ҳамкорликда ишлайди. Арзонлаштирилган фаблет фақат бир хил – 128 гигабайтлик доимий хотира билан чиқариляпти.

Интернетда аллақачон Galaxy Note 10 Lite’нинг «жонли» сурати ҳам тарқалган:

Фаблет аккумуляторининг ток сиғими 4500 мА/соатга тенг ва у 25 ваттлик тезкор қувватлаш технологиясига эга. Қурилманинг бармоқ изи сканери экранига жорий этилган. Смартфон компаниянинг One UI 2.0 график қобиғи остидаги Android 10 операцион тизими билан таъминланган.

Galaxy Note 10 Lite ҳам, табиийки, Samsung фаблетларининг асосий аксессуари – S Pen стилусига эга. Bluetooth Low-Energy (BLE) қўлланиши сабабли стилус ёрдамида тақдимот слайдларини алмаштириш, видеоконтентни бошқариш ёки суратга олиш мумкин – булар учун S Pen’даги тугмачани босиш кифоя. Бундан ташқари, фаблет экрандаги ишоралар орқали бошқаришни қўллаб-қувватлайди, стилус ёрдамида ёзилган қўлёзма матнни босма матнга айлантириб беради. Samsung Notes иловаси ёрдамида қайдларни «йўл-йўлакай» ёзиш эса янада осонлашган ва тезлашган.

ЎҚИНГ: Samsung, CES 2020: Кинодаги ҳаёт реалликка айланмоқда!

Қуйидаги суратда Galaxy S10 Lite ҳамда Galaxy Note 10 Lite моделларининг барча асосий хусусиятларини ўзаро таққослаб кўришингиз мумкин:

Арзонлаштирилган фаблетнинг олд камераси 32 мегапикселлик бўлиб, F2.2 апертурали. Бош камерасидаги учала датчик ҳам 12 мегапикселлик: кенг бурчакли (F1.7, Dual Pixel AF ва OIS), ультра кенг бурчакли (F2.2) ҳамда телеобъектив (F2.4, OIS ва 2 карралик зум).