Facebook тасмамиздан кераксиз пост ва лайкларни ўчирамиз
Facebook’да бир замонлар ўзингиз эълон қилган постларингиз, ёзган изоҳларингиз, қўйган лайкларингиз бугунги қарашларингизга тўғри келмай қоляптими? Уларни буткул ўчириб ташлашни истайсиз, аммо излаб топишга қийналасизми? Chrome браузери учун ишлаб чиқилган Facebook Post Manager кенгайтмаси ижтимоий тармоқдаги керакли ҳаракатларингизни излаб топиш ва ўчиришда ёрдам беради.
Бунинг учун аввало Chrome Web Store каталогидан Post Manager кенгайтмасини юклаб олиб ўрнатинг.
Кейин Facebook’да ўз саҳифангизни очиб, ижтимоий тармоқдаги ҳаракатларингиз тарихини акс эттирувчи «Журнал действий» бўлимига киринг. Унда сизнинг барча постларингиз, изоҳларингиз ва лайкларингиз вақтга кўра сараланган рўйхат тарзида кўриниб туради.
Энди браузернинг жиҳозлар панелидаги Facebook Post Manager кенгайтмаси тугмачасини босинг. Қалқиб чиққан ойнада қидирув параметрларини белгиланг.
Текшириш лозим бўлган ой ва йилни белгиланг. Ҳаракатлар тарихингиздаги ўша сиз ўчириб ташламоқчи бўлган постлар, изоҳ ва лайкларни бирлаштириб турувчи «калит сўз»ни киритинг. Масалан, сиз бир пайтлар татуировкага қизиққансиз ва бу ҳақда постлар ёзгансиз, бировларнинг шу мавзудаги постларини изоҳлагансиз, лайк босгансиз. Энди ўшалардан қутулмоқчисиз ва шу сўз мавжуд бўлган ҳаракатларингизни ижтимоий тармоқдаги тарихингиздан буткул ўчиришингиз керак. Демак, «тату» (чунки кўпчилик татуировкани қисқартириб шундай атайди) сўзини киритиб излашингиз лозим. Дарвоқе, мазкур кенгайтма орқали «калит сўз» мавжуд бўлган ёки аксинча – у учрамайдиган ҳаракатларингизни белгилаш имкони бор.
Хуллас, қидирув параметрларини белгилаб олганингиздан сўнг, агарда натижаларни яна бир марта кўздан кечиришни истасангиз, Prescan on Page опциясини белгилаб қўйинг.
Энди эса, топилган ёзувларни нима қилиш кераклигини белгиланг: ўчириб ташлайсизми, яширасизми, лайкларни бекор қиласизми ёки захира нусхасини яратасизми – Facebook Post Manager кенгайтмаси барчасига имкон беради.
Жараённи бошлашдан аввал кенгайтма бу ҳаракатингизнинг жиддий эканлигини тасдиқлашингизни сўрайди. Кейин эса ҳаракатларингиз тарихини тезда кўриб чиқади ва сиз белгилаган мезонлар бўйича кераксиз ёзувларни ўчириб ташлайди.
Бўлди, ўтмиш энди ўтмишда ҳам қолмади. Янги ҳаёт сари олға!
