Флоридалик шахс Galaxy Note7 ёниши туфайли Samsung’ни судга берди

Флоридалик шахс Galaxy Note7 ёниши туфайли Samsung’ни судга берди

Samsung Galaxy Note7 смартфонининг ёниб кетиши билан боғлиқ муаммо ҳақида ўтган бир ой давомида тармоқда  жуда кўп хабарлар ёзилди. Жанубий Кореялик гигант юзага келган ушбу муаммо сабабли улкан молиявий йўқотишларга дуч келди. Айни пайтда компания АҚШда мазкур маркадаги смартфонларни расман қайтариб олиш дастурини бошлаган. Гарчи АҚШ ҳудудида шу кунгача Galaxy Note7’нинг ёниши билан боғлиқ жами 92 та ҳолат қайд этилган бўлса-да, ҳали бирорта фойдаланувчи компанияга расмий даъво қўзғамаган эди.

Бироқ бундан бир неча кун олдин, АҚШнинг Флорида штатида яшайдиган Джонатан Стробел исмли шахс унинг Samsung Galaxy Note7 телефони чўнтагида ёниб кетиши оқибатида тана жароҳати олгани сабабли ишлаб чиқарувчига қарши расмий даъво билан судга мурожаат этган.

Смартфоннинг ёниши натижасида Стробелнинг қўли ва оёғининг маълум қисмлари куйган. Компаниянинг мазкур моделдаги смартфонлардан фойдаланишни тўхтатиш тўғрисидаги огоҳлантириши 9-сентябр куни, яъни Стробелнинг жароҳат олишидан бир неча кун олдинроқ эълон қилинган. Эндиликда мазкур даъво Флорида суди томонидан кўриб чиқилиб, тегишли қарор қабул қилиниши кутилмоқда.

 

Хабарларни тез ва осон ўқиш учун Андроид иловамизни сақлаб олинг.