Гаджетлардан кундалик фойдаланиш вақти 3 йилда 1.36 соатга кўпайган

Гаджетлардан кундалик фойдаланиш вақти 3 йилда 1.36 соатга кўпайган

18-32 ёшли ахборот технологиялари фойдаланувчилари ўртасида ўтказилган сўровда маълум бўлишича, учинчи минг йилликнинг фаол ва тиниб-тинчимас кишилари кундалик ҳаётларининг 3 соатини смартфон ва планшетлар мониторига тикилиб ўтказмоқда эканлар.

Мазкур маълумот жаҳоннинг етакчи тадқиқот компанияси ҳисобланган Global Web Index (GWI) компанияси томонидан 3 май куни эълон қилинган. Тадқиқот натижалари инсон рақамли технологияларга сарфлаётган вақтининг кўлами тобора ошиб бораётганини кўрсатган.

2012 йилда ўтказилган худди шу йўналишдаги изланишларда фойдаланувчилар кундалик 1.78 соат вақтларини рақамли экранлар қаршисида ўтказишлари аниқланган эди. 2014 йилда эса бу кўрсатгич 2.72 соатга, 2015 йилда 3.14 соатга ошган.

GWI компанияси ўсиш шу суръатда давом этса, жорий ўн йиллик охирига келиб смартфон ва бошқа митти гаджетлардан фойдаланиш инсон умрининг асосий қисмини банд қилишини айтмоқда.

Америкалик олимларининг маълум қилишича, одам смартфондан қанча кўп фойдаланса, тушкун кайфиятга тушиб қолиш эҳтимоли ҳам шунчалик юқори бўлади. Тушкун кайфиятдагилар смартфондан кунига ўртача 68 дақиқа фойдаланади. Ҳаётдан мамнун, яхши кайфиятдаги инсонларда эса бу кўрсаткич 17 дақиқани ташкил қилади.

Бундан бир муддат аввал Жанубий кореялик олимлар смартфондан фаол равишда фойдаланиш болалар учун зарарли эканлигини, нигоҳнинг доимий равишда пастга, кичик экранга қадалиши кесишувчи ғилайликни юзага келтиришини маълум қилишган эди.