«ГАИ»нинг боди-камерасини қўлда тайёрласа нима бўлади?

  •   DiMaX
  •  1525
  •  07.02.2020 10:42

«ГАИ»нинг боди-камерасини қўлда тайёрласа нима бўлади?

Жорий йилнинг 1 январидан юртимиздаги йўл-патруль хизмати ходимлари боди-камера, яъни мобиль камерадан фойдаланган ҳолда хизмат ўташни бошлашган. Мобиль камералардан фойдаланиш тартиби бўйича айрим саволларга Ички ишлар вазирлиги ЙҲХББ Ахборот хизмати берган жавобларни эълон қилганмиз.

ЎҚИНГ: Ҳайдовчилар, диққат қилинг: мобиль камера нигоҳидасиз!

Тошкент вилоятининг Чиноз туманида фонардан ясалган «боди-камера», елим кўкрак нишони ва қалбаки гувоҳнома билан «хизмат олиб бораётган» сохта «ГАИ» қўлга олинди. Бу ҳақда Тошкент вилояти ИИББ ахборот хизмати хабарига таяниб Xabar.uz нашри ёзмоқда.

Унга кўра, шу йилнинг 6 февраль куни М-39 «Тошкент-Термиз» халқаро автомобиль йўлида хизмат олиб бораётган Тошкент вилояти ИИББ ЙҲХБ инспекторлари, сафдор Бекжон Ережепов ва сержант Мансур Норматовлар ушбу йўлда ҳаракатланиб келаётган «Камаз» юк машинасини кўрикдан ўтказиш учун тўхтатади. Шунда ҳайдовчи инспекторларга чамаси 900 метрлар оралиғида бир «ГАИ» ходими уни тўхтатиб ҳужжатларини текширганлигини, аммо унинг боди-камераси одатдагидан бошқачароқ эканлигини маълум қилади.

ЙПХ инспекторлари зудлик билан айтилган жойга етиб бориб, у ерда Nexia русумли автомобилда ўтирган «ходим»ни кўришади. Ундан кимлигини сўрашганида у воқеа жойидан қочиб кетмоқчи бўлади. Ходимлар уни қўлга олиб, Чиноз туман ИИБга олиб боришади. Шундан сўнг, ИИБ тезкор ходимлари холислар иштирокида унинг бошқарувида бўлган автомашина салонини кўздан кечиришганида, у ердан 24 дона бир хил серия ва рақамли маъмурий баённомалар, Фарғона вилояти ИИБ томонидан берилган хизмат гувоҳномасининг рангли нусхаси ҳамда унинг эгнидаги кийимига ўрнатилган, «Диққат» ёзуви туширилган қалбаки боди-камера ва елимдан эритиб ясалган ЙПХ инспекторининг кўкрак нишони ҳамда жезл ашёвий далил сифатида олинган.

– Муқаддам ички ишлар органида ишлаганман, 2016 йилда ўз ихтиёрим билан бўшаганман, – дейди сири фош бўлган сохта «ГАИ» ходими. – Кўкрак нишони ва боди-камерани ўзим қўлбола усулда ясаган эдим. Хато қилдим, бу ишимдан пушаймонман.

Ҳозирда Чиноз туман ИИБ ҳузуридаги тергов бўлими томонидан терговга қадар суриштирув ҳаракатлари олиб борилмоқда.

Қайд этилишича, ушбу шахс аввал ҳам – 2018 йилнинг январь ойида ички ишлар органи ходимининг кийимини кийиб, қўлбола усулда ясалган кўкрак нишонини тақиб сохта «ГАИ»лик билан Сирғали тумани ҳудудида шуғулланаётган вақтда қўлга тушган экан.

Унга нисбатан Ўзбекистон Республикаси ЖКнинг 227 ва 228-моддалари 1-қисмида кўрсатилган жиноятларни содир этганлик юзасидан айблов эълон қилиниб, суд қарори билан ахлоқ тузатиш ишлари жазоси қўлланилган.

Тошкент вилояти ИИББ фуқаролардан ушбу шахсни таниса ва унинг ноқонуний ҳаракатларидан жабр чеккан бўлса мурожаат қилишларини сўраган.

ЎҚИНГ: ЙПХ ходимининг смартфони боди-камера бўла оладими?

Хабарларни тез ва осон ўқиш учун Андроид иловамизни сақлаб олинг.