Galaxy A41 бенчмаркда: Samsung уни арзон қилиш учун кутилмаган ишга қўл урибди!
Samsung компанияси ўрта нархли Galaxy A ҳамда ҳамёнбоп Galaxy M туркумларида бир қатор смартфонларни тайёрламоқда. Масалан, куни кеча Wi-Fi Alliance ташкилотида ҳам рўйхатдан ўтган Galaxy M21 бестселлер бўлиши кутилмоқда.
ЎҚИНГ: Иккита ҳамёнбоп Samsung хити тайёр: учталик камера, бақувват батарея, кучли процессор...
Кейинги пайтларда инсайдерлар томонидан айрим хусусиятлари эълон қилинаётган ўрта нархли смартфонлардан яна бири эса Samsung Galaxy A41 бўлади. Бугун – 31 январь куни уни Geekbench сервисида текшириб кўришди ва у самарадорлик бўйича қуйидагича натижа намоён этди:
Гувоҳи бўлаётганингиздек, SM-A415F кодли рақами остида қайд этилган бу смартфон якка ядроли синовда 1684 балл, кўп ядроли имтиҳонда эса 5043 балл тўплаган.
ЎҚИНГ: Galaxy A31 ва Galaxy A41 ҳам бақувват батарея, кучли камерага эга бўляпти
Лекин бенчмаркда акс этган маълумотлардан энг қизиғи – Galaxy A41 моделининг MediaTek Helio P65 чипсетига эга эканидир. Зеро, Samsung ушбу линейканинг вакилларида тайванлик чипсознинг процессорларини умуман қўлламасди. Афтидан, жанубий кореяликлар маҳсулот таннархини бироз пасайтириш учун арзонроқ чипсетга мурожаат этишларига тўғри келган.
Galaxy A41 моделининг «электрон юраги» 1,70 ГГц такт частотасида ишловчи саккизта ядрони ўзида жамлаган. Смартфоннинг самарадорлигини таъминлашда ушбу процессорга 4 гигабайтлик тезкор хотира елкадош бўлади. Эҳтимол, унинг 6 гигабайтлик конфигурацияли варианти ҳам бўлар – буёғини энди вақт кўрсатади.
Samsung ушбу қурилмани Android 10 асосида тайёрланган One UI 2.0 прошивкаси билан таъминлаган. Миш-мишларга қараганда, унинг доимий хотираси бошланғич конфигурацияда 64 гигабайтга тенг бўлади. Шунингдек, унинг бош камерасидаги асосий сенсори 48 мегапикселлик бўлиши, 3500 мА/соатлик аккумулятори эса 15 ваттлик тезқор қувватланиши ҳам айтилмоқда.
Афсуски, Galaxy A41 нархи ва тақдимот санаси ҳозирча номаълум; бу борадаги янгиликларни биз билан бирга кузатишда давом этинг.
ЎҚИНГ: Samsung февралда яна иккита арзон, аммо «бағрикенг» смартфон тақдим этади!
