Galaxy A70 тақдим этилди: Snapdragon 670 ва иккита 32 МПлик камера; 4500 мА/соатлик аккумулятори эса Galaxy S10’дан тез қувватланади!
Куни кеча TENAA регулятори Galaxy A60 ҳамда Galaxy A70 моделларининг «жонли» расмларини ва айрим хусусиятларини ошкор қилган эди. Энди эса Samsung уларнинг каттасини тақдим этди ва у кўп жиҳатдан ҳайратларга сазовор!
ЎҚИНГ: «Жонли» фото: Galaxy A90 смартфони Samsung’нинг энг ромсиз дисплейига эга!
Samsung Galaxy A70 модели Super AMOLED матрицали, диагоналига 6,7 дюймлик экранга эга ва унинг тасвир аниқлиги Full HD+ форматида (2400х1800 пикселлик). Компаниянинг таъкидлашича, бундай энсиз узун дисплей видео томоша қилиш учун энг мақбул форматдир. Бармоқ изи сканери ҳам экраннинг ўзига жойланган.
Infinity-U дисплейнинг томчисимон «кемтиги»да 32 мегапикселлик (диафрагмаси – F/2,0) олд камера жойлашган.
Смартфоннинг бош камераси уч модулли бўлиб, уларнинг асосий сенсори ҳам 32 мегапикселлик аниқликда (диафрагмаси – F/1,7). Иккинчи модуль эса 8 МПлик датчик ҳамда F/2,2 диафрагмали кенг бурчакли объективга эга. 5 мегапикселлик учинчи модул эса саҳналарнинг чуқурлигини таҳлил этиш учун қўлланади.
Galaxy A70 аппарат таъминоти асосини Qualcomm Snapdragon 670 процессори ҳамда 6-8 ГБлик тезкор хотира ташкил этади. Қурилманинг доимий хотираси 128 гигабайтлик бўлиб, яна microSD форматли карта ҳам жойлаш мумкин.
Смартфон аккумулятори ҳам харидорларга маъқул келади – 4500 мА/соатлик, лекин бу ҳам энг муҳими эмас. Galaxy A70 модели нақ 25 ваттлик қувватлаш блогидан тезкор зарядлана олади – бунақаси ҳатто Galaxy S10 флагманида ҳам йўқ! Шундай тезкор қувватланиш бу смартфондан ташқари фақатгина Galaxy S10+ 5G бўлиши маълум.
Galaxy A70 энг янги – Android 9.0 Pie операцион тизим талқинига эга, у One UI интерфейси остида фаолият кўрсатади. Афсуски, мазкур моделнинг нархи ҳам, сотувга чиқиш вақти ҳам ҳозирча айтилмаган. Буларнинг барчаси 10 апрелдаги маросимда маълум этилиши кутилмоқда, Samsung унда мазкур туркум флагмани – Galaxy A90 смартфонини тақдим этади.
Жаҳон бозорига чиқарилган аксарият Samsung смартфонларини, жумладан, Galaxy S10 ҳамда Galaxy S10+ флагманларини эса аллақачон Terashop.uz интернет-дўконимиздан онлайн усулда сотиб олиш мумкин.
