Galaxy A70s тақдим этилди – Redmi Note 8 Pro моделига Samsung’нинг жавоби!

  •   DiMaX
  •  3106
  •  28.09.2019 17:05

Galaxy A70s тақдим этилди – Redmi Note 8 Pro моделига Samsung’нинг жавоби!

Март ойида тақдим қилинган «оддий» Galaxy A70 (сотиб олиш) смартфони уч модулли камераси ҳамда катта экранга интеграция қилинган дактилоскопик датчиги билан Galaxy S10 (харид қилиш) флагманига яқин келиб қолган. Унинг янгиланган версияси – Galaxy A70s эса компаниянинг 64 мегапикселлик камера датчигига эга биринчи смартфонидир.

ЎҚИНГ: «Ўнта қўй нима бўлади!?» – Samsung яна камида тўртта моделда Galaxy A смартфони тайёрлаяпти

Samsung компанияси, ниҳоят, узоқ кутилган Galaxy A70s смартфонини Ҳиндистонда тақдим этди. Бош камерасидаги 64 мегапикселлик ISOCELL GW1 Bright сенсори туфайли уни оммабоп Redmi Note 8 Pro моделига рақобатчи, дейиш мумкин эди-ю, фақат... икки карра қимматлигини айтмаса!

Янги смартфонни Galaxy A70 билан таққосласак, унчалик ҳам ўзгармаганлигига амин бўламиз; асосий устунлиги – шу камерасида. Унинг уч модулли камерасидаги 64 мегапикселлик бош датчиги f/1,8 диафрагмали объектив билан тақдим этилган. 8 МПлик иккинчи модулнинг ультра кенг бурчакли объективи апертураси f/2,2 бўлса, 5 МПлик учинчи сенсор f/2,2 диафрагмали объективга эга.

Samsung Galaxy A70s диагоналига 6,7 дюймлик Super AMOLED билан жиҳозланган бўлиб, тасвир аниқлиги 2400х1080 пикселлик. Унинг ярим доира шаклидаги кемтигида жойлашган 32 мегапикселлик олд камера эса селфи ишқибозларига маъқул келиши аниқ.

Жанубий кореяликлар ушбу смартфонни OneUI интерфейси остидаги Android 9 Pie операцион тизими билан чиқаришган. Galaxy A70s моделининг «электрон юраги» Snapdragon 675 платформаси бўлиб, 6 ҳамда 8 гигабайтлик тезкор хотирага эга вариантларда таклиф этилади. Ҳар иккаласида ҳам доимий хотира 128 ГБга тенг, яна иккита SIM-карта уячасидан алоҳида microSD-карта учун ҳам бўлмача ажратилган.

ЎҚИНГ: Samsung Galaxy A70'га дастур янгиланиши келишни бошлади. Ўзгаришлар билан танишинг

Galaxy A70s девайсининг 4500 мА/соатлик аккумулятори 25 ваттлик усулда тезкор қувватлана олади. Бармоқ изи сканери бевосита дисплейга интеграция қилингани ҳам харидоргирлигини оширса керак.

Дарвоқе, харид масаласида: Samsung Galaxy A70s бугун – 28 сентябрданоқ Ҳиндистоннинг ўзида оқ, қизил ва қора рангли корпусларда савдога чиқарилди. Унинг тезкор/ички хотираси 6/128 гигабайтлик варианти 412 долларга нархланган бўлса, 8/128 ГБлиги учун компания 440 доллар сўраяпти.

Galaxy A70s бизнинг бозорларга қачон ва қандай нархда етиб келиши ҳозирча номаълум. Шу кунгача глобал бозорга чиққан бир қатор Samsung телефонларини эса аллақачон 705 000 сўмдан бошланувчи нархлар эвазига Terashop.uz интернет-дўконимиздан сотиб олиш мумкин.

ЎҚИНГ: Samsung энг ихчам ва арзон Galaxy A смартфонини тайёрлаяпти!

Terabayt.uz сайтининг видеолари: Youtube'даги каналимизда!