Galaxy A73'нинг нархи, рендерлари ва техник жиҳатлари сиздирилди
Икки ҳафта олдин Galaxy А73 смартфонининг илк рендерлари эълон қилинган эди. Кеча OnLeaks инсайдери смартфоннинг 3D рендерларини тақдим этди.
ЎҚИНГ: Galaxy S21 FE'нинг нархи ва қандай турдаги рангларда сотувга чиқиши маълум бўлди
Samsung Galaxy A73 смартфони 6.7 дюймли FullHD+ AMOLED дисплейи билан жиҳозланади. Дисплей юқори қисмининг ўртасидан юмалоқ тирқишли селфи камера ўрин олади. Бармоқ изи сканери эса экран остига жойлаштирилади.
Маълумотларга кўра, дисплей 90Hz янгиланиш частотасида ишлайди. Аввалги маълумотларда смартфон дисплейи 120Hz янгиланиш частотасини қўллаб-қувватлаши айтилган эди.
Орқа панелдаги камера модулидан тўртта камера ўрин олади. Асосий камера 108МП бўлиши кутилмоқда. Қолган камераларнинг техник жиҳатлари ҳақида ҳеч қандай маълумот йўқ.
Шунингдек, смартфон Snapdragon 750G чипи билан жиҳозланади ҳамда Android 12 операцион тизимига асосланган One UI 4.0 график қобиғида ишлайди. Хотира хажми эса 8/128ГБ дан бошланади.
Қурилма 5,000 мАс сиғимли аккумулятор билан жиҳозланади, уни эса 33 ваттда қувватлаш мумкин бўлади. Смартфон корпуси пластикдан ишланган бўлиб, унинг қалинлиги 7.6 миллиметрни (камеранинг бўртиб чиққанлигини ҳисобга олса 9.3 мм) ташкил қилади. IP67 стандарти қурилмани чанг ва сувдан ҳимоя қилади.
Galaxy A73 тилла ва қора рангларда тақдим этилади. Смартфон биринчи Ҳиндистонда 440 доллар нархда сотувга чиқади.
ЎҚИНГ: Galaxy S22 сериясидаги смартфонларнинг фон расмлари эълон қилинди
