Galaxy A73'нинг рендерлари эълон қилинди
Шу йилнинг сентябрь ойида Galaxy А73 смартфони 108МП камерага эга бўлиши ҳақидаги миш-мишлар тарқалган эди. Ҳозир эса смартфоннинг рендерлари эълон қилиниб, у қандай дизайнда бўлиши маълум бўлди.
ЎҚИНГ: Galaxy A33 5G'нинг аккумулятор ҳажми қанча бўлиши маълум бўлди
Янги Galaxy A73 ташқи кўриниши билан А72'ни эслатиб юборади. Қурилма дисплейининг юқори ўрта қисмида тирқишли селфи камера жойлашган бўлса, орқа панелдаги камера модулидан тўрта камера ва LED чироғи ўрин олган.
Қувват ҳамда овозни созлаш тугмалари қурилманинг ўнг томонида, USB-C порти, микрофон ҳамда асосий динамик эса пастки томонда жойлашган. Samsung ушбу смартфондан 3.5 мм аудио жекни олиб ташлайди. Энди унинг ўрнини SIM-карта уяси эгаллайди.
Миш-мишлардан келиб чиққан ҳолда Technizo ҳамда LetsGoDigital ҳамкорликда смартфоннинг 3D рендерларини тақдим этди. Бироқ қурилманинг якуний дизайни бундан фарқ қилиши мумкин.
Galaxy A73 5G смартфони Snapdragon 750G чипи, 6.7 дюймли FullHD+ AMOLED дисплейи, экраности бармоқ изи сканери билан жиҳозланади. Қурилма дисплейи 120Hz экран янгиланиш частотасини қўллаб-қувватлаши тахмин қилинмоқда.
Маълумотларга кўра, қурилма корпуси пластикдан ишланади, IP67 стандарти эса смартфонни сув ва чангдан ҳимоя қилади.
Galaxy A73 қурилмаси 108МП асосий камерага эга бўлиши тахмин қилинмоқда. Шунингдек, у 5,000 мАс сиғимли аккумулятор ҳамда 25 ватт қувватлаш технологияси билан жиҳозланади. Қурилма Android 12'га асосланган One UI 4.0 операцион тизимида ишлайди.
Samsung компанияси A72 смартфонини шу йилнинг март ойида тақдим этган эди. Galaxy A73 эса келаси йилнинг иккинчи чорагида намойиш этилиши кутилмоқда.
ЎҚИНГ: Galaxy смартфонларининг Android 12 операцион тизимига ўтиш саналари эълон қилинди
