Galaxy J8: Samsung'дан илғор смартфон
Айни пайтда Samsung компанияси янги мобил алоқа қурилмаларини тайёрлашга киришиб кетган. Жумладан, кореялик ишлаб чиқарувчи "Galaxy J" ҳамда "Galaxy A" туркумлари орқали ўрта нархли смартфонлар бозорини эгаллаш учун бор имкониятини ишга солмоқда.
Яқин икки ой ичида ҳар иккала туркумда бир-биридан қизиқ ва диққатга сазовор моделлар тақдим қилиниши кутилмоқда. Samsung Galaxy J8 ҳамда J8+ 2018 йилда илғор жиҳатлар билан таъминланади.
Мисол учун, девайснинг йирик ва тўлиқ экранли Super AMOLED-экранининг томонлар нисбати 18,5:9 нисбатли бўлади. Бу гаджет ўзининг нархи доирасида бир қатор техник жиҳатлари билан ҳам мақтаниши мумкин.
Ҳозирча аниқланган хабарларга кўра, Galaxy J8 (2018) ромдан холи бўлган экрани билан рақибларидан устунлик қилади. Унинг экранлар томони 18,5:9 нисбатли ва 2240 га 1080 та пикселга (FHD+) тенг бўлади.
Кеча Samsung Galaxy J8 ҳамда J8+ смартфонларининг ишлаб чиқарилаётгани тасдиқланди. Хитойлик инсайдерлардан бири мазкур моделларнинг аккумулятор батареялари акс этган суратларни интернет тармоғида эълон қилган.
Маълум бўлишича, биринчи моделнинг аккумулятори 3000 мА соат, иккинчисиники – 3500 мА соат бўлади. Ҳозирча уларнинг тезкор қувват олиш олмаслиги маълум эмас.
Экспертларнинг фикрича, бу йилги Samsung Galaxy J7 ўзидаги 3 гигабайтли тезкор хотира ҳамда 8 ядроли Exynos 7870 процессори билан, J8+ модели эса нисбатан кучли -- 8 ядроли Qualcomm Snapdragon 625 чипи ҳамда 4 гигабайтли тезкор хотираси билан ўзига хос бўлади.
Қайд этилишча, ҳар иккала телефон қадоқдаёқ Android 8.0 Oreo операцион тизимининг Samsung Experience UI 9.0 талқини бошқарувида фаолият кўрсатади.
Samsung компаниясининг нарх сиёсатидан келиб чиқадиган бўлсак, Samsung Galaxy J8 ҳамда J8+ моделлари халқаро смарфтон бозорида хитойлик рақибларидан сезиларли даражада қиммат бўлади.
Хусусан, Xiaomi Redmi Note 5 Pro ёки Meizu M6s каби муносиб рақиблар ҳозирданоқ ҳамёнбоп ва ўрта нархли смартфон бозорини эгаллаб олган.
Кореялик девайсларда Wi-Fi 802.11ac (2,4 ГГц + 5 ГГц), Bluetooth 5.0 LE ва NFC модуллари бўлади.
