Galaxy Note 10+ учун 3D Сканер иловаси яратилди
Кеча Samsung Galaxy Note 10 ва Note 10+ смартфонлари 70 дан ортиқ мамлакатда расман сотувга чиқди. Ушбу тарихий воқеани нишонлаш учун компания янги илова яратиб, уни ўз мижозларига тақдим қилди. Илова 3D Сканер (3D Scanner) деб номланади ва унинг релизи Galaxy Note 10+ сотувининг бошланиши билан бир вақтга тўғри келди.
Илова флагманнинг 3D ToF (Парвоз вақти) камерасидан фойдаланган ҳолда реал объектларни сканер қилиб, уларнинг 3D моделини яратиш имконини беради. Galaxy S10 5G ва Galaxy A80'ларда ҳам ToF камера мавжудлиги боис, дастур ушбу девайсларда ҳам ишлаши керак.
3D Сканер иловаси айни дамда Samsung Galaxy Store'да мавжуд. Иловани юклаш учун Galaxy Store дўконига киринг ёки шу ерга босинг. Дастурни ўрнатгандан сўнг жорий функциядан тўғридан-тўғри илованинг ўзи орқали ёки Bixby Vision ёрдамида фойдаланиш мумкин. Иккинчи муқобил учун Камера иловасини ишга тушириб, Bixby Vision устига босинг, сўнг иловалар панелига ўтинг. Мана шу ерда 3D Сканер иловасини кўрасиз.
Маълум бир объектнинг 3D моделини яратиш учун уни ҳамма томондан сканерлаб чиқишингиз керак; ушбу жараёнда объект атрофида бошқа нарсаларнинг бўлмаслигига ишонч ҳосил қилинг. Акс ҳолда, сиз хоҳламаган объект ҳам сканер қилинади. Samsung'дагилар нарса-буюмларнинг уч ўлчамли моделини яратишда объектнинг 20—80 см катталикда бўлишини маслаҳат бермоқда. 3D модель тайёр бўлгач, уни тўғридан-тўғри бошқалар билан улашиш ёки смартфон камераси орқали ҳосил қилинган расм ва видеолар таркибига қўшиб қўйиш имкони ҳам мавжуд.
ЎҚИНГ: Бугундан Galaxy Note 10 ва Note 10+ 70 та мамлакатда сотувга чиқди
