Galaxy Note 8'нинг реклама суратини Samsung "тасодифан" чоп қилди
Август-сентябр ойлари технологик ахборотлар ўртасидаги "жанг"ларга бой бўлади. Боиси, сентябрда Apple анъанага мувофиқ янги айфонни тақдим қилса, Samsung бозорга ашаддий рақибига зарба бериш учун август ойида янги флагманни тайёрлайди.
Эсингизда бўлса, 2016 йилда ҳам Galaxy Note 7 шоша-пиша тайёрланиб, iPhone 7'дан олдин тайёрланиб, бозорга чиқарилган ва бу маркетинг сиёсати флагманнинг муваффақиятсизлиги билан якун топган эди.
Тарих такрорланмоқда: шу кунларда Samsung Galaxy Note 8 фаблети iPhone 8 флагманига қарши тайёрланаётгани қулоққа чалинмоқда.
Бугун – 14 июлда Samsung компаниясининг чиплар ишлаб чиқарувчи Samsung Exynos бўлинмаси ўзининг Twitter ижтимоий тармоғидаги саҳифасида Samsung Galaxy Note 8 фаблетининг қуйидаги илк расмий реклама суратини эълон қилди.
Инсайдерлар Galaxy Note 8 сотиладиган давлатидан келиб чиқиб, Snapdragon 835 ёки Samsung Exynos 8895 процессорларида ишлаб чиқарилишини айтишган эди.
Реклама суратида эса "Чексиз имкониятлар яратадиган процессор" шиори остида янги -- "9" рақамли Exynos процессорига нисбат берилган.
Суратдаги флагманнинг Galaxy Note 8 экани қайд этилмаган бўлса ҳам, у кўринишидан Samsung'нинг бирор флагманига ўхшамайди ва дизайни Note 8'га оид янгиликларга монанд. Жумладан, дисплейнинг қайрилма экани эътиборни тортади. Қолаверса, бу гаджет Galaxy Note 8'нинг жилди сифатида тармоқда тарқалган ғилофларга мос.
Шу тахлит, компания мухлисларига смартфон тақдимотигача янги илғор смартфонига баҳо бериш имконини берган.
Кўриниб турибдики, реклама суратидаги мобил алоқа воситасининг дизайни Infinity, яъни чексиз дисплей ечимига эга бўлган. Дисплей қуйисида ўрнашган, унинг атрофини ўраб олган ромлар аввалги флагманлар билан солиштириб кўрганда, янада юпқалиги билан диққатга сазовор. Корпус ҳам нисбатан юпқа дизайнда ишланган.
«Тасодифан» эълон қилинган суратга кўра, Samsung уни яқин орада тақдим қилади. Шу орқали бренд жамоатчиликнинг диққатини шу кунларда "тилларда достон" бўлаётган iPhone 8'дан чалғитишга уринмоқда.
Сўнгги янгиликларга кўра, 6,3 дюймли Samsung Galaxy Note 8 девайси 23 август куни тақдим қилиниши мумкин. Телефон Quad HD+ (2960 x 1440 пикселли) дисплейга эга бўлади.
Маркетологлар фаблетнинг сентябрда сотувга чиқишига шубҳа қилишмаяпти. Бу эса кореялик хоҳлаётганидек, iPhone 8 савдосига жиддий зарар етказади. Шунингдек, фаблет нарх борасида ҳам рақибидан қолишмайди ва бозорга 1100 доллардан чиқарилиши мумкин.
