Galaxy Note 9’нинг илк расмий сурати эълон қилинди!
Samsung шу кунларда ўзининг тўққизинчи авлод фаблетини тақдим этишга тайёргарлик кўрмоқда. Аммо бу гаджет аллақачон жонли тарзда «қўлга тушган»идан ҳам хабарингиз бор.
ЎҚИНГ: Samsung Galaxy Note 9 ҳали намойиш этилгани йўқ, лекин кимлардир уни аллақачон тутиб юрибди
@Evleaks ники билан машҳур бўлган инсайдер Эван Бласс (Evan Blass) ўзининг Twitter аккаунтида Samsung Galaxy Note 9 планшетофонининг биринчи расмий рендер-суратини чиқарди. Фаблетнинг аввалги расмларидан фарқли ўлароқ, бу тасвир чиндан ҳам ушбу қурилманинг матбуот учун тайёрланган материалларига тегишли.
ЎҚИНГ: Galaxy Note 9: тақдимот, нарх, жиҳат ва савдога чиқадиган кун
Эслатиб ўтамиз, Samsung Galaxy Note 9 моделининг асосий ўзига хосликларидан бири – янгиланган S Pen стилусидир. У Bluetooth модули билан таъминланган бўлиб, шу орқали камерани, мусиқалар ижросини ва смартфоннинг бошқа функцияларини бошқариш мумкин.
Янги суратда яхши кўриниб турганидек, планшетофон асосий камерасининг объективлари ўлчамига кўра ўзаро анча фарқланади. Горизонтал жойлашган фотомодуллар қаторида фоточақноқ ҳамда юрак уриши частотасини ўлчовчи датчик жойлашган.
Samsung Galaxy Note 9 смартфони 9 августда тақдим этилиши кутилмоқда. Жанубий кореялик техногигантнинг аллақачон сотувга чиқарилган аксарият телефонларини эса ўзимизда ҳам расмий кафолат билан олиш мумкин.
