Galaxy Note 9'нинг нархи айтилди
Samsung Galaxy Note 9 фаблетининг тақдимотига бир ойдан камроқ вақт қолди. 9 август куни Жанубий Кореянинг ва жаҳоннинг етакчи IT-компанияси смартфон саноатига янги илғор девайсни тақдим қилади. Ҳозирданоқ мазкур мобил телефон нархига оид маълумотлар тарқалмоқда. Хусусан, фаблет яқинда АҚШ нинг FCC департаментида ҳам яқиндагина рўйхатга олинди.
Бугун инсайдерлар тарқатган хабарлардан маълум бўлишича, мазкур гаджет Европа смартфон бозорида 1160 АҚШ долларидан бошлаб сотилади. Ушбу нарх девайснинг 6 Гбайт тезкор ҳамда 128 Гбайт доимий хотирага эга талқини учун белгиланган.
Шу билан бирга, Интернетда тарқалаётган реклама баннерида акс этган постерда фаблет жамоатчилик эътиборига қуйидаги шиор билан таништирилмоқда: «The new super powerful Note» («Янги супер-самарадор Note»).
Шунингдек, суратда янгича кўринишдаги S Pen ҳам тасвирланган. Аппарат бош камераси қўш сенсорли, корпусининг орқасида бармоқ изи сканери ҳам бор, қуйида эса симметрик дизайнда USB type-C порти ҳамда аудио қулоқчинлар учун анъанавий туйнук мавжуд.
Шу кунга қадар олинган хабарларда қайд этилишича, фаблетда Exynos 9 Series 9810 ёки Qualcomm Snapdragon 845 процессори, 6,4 дюймли дисплей (2960 × 1440 пикселли) экран ҳамда ток сиғими 4000 мА·соат бўлган аккумулятор батарея бўлади. Фойдаланувчилар янги авлод Bixby 2.0 овозли ёрдамчиси билан мулоқотда телефондан янада самарали фойдаланишлари мумкин.
